Project Management Unit PHE Department buatsaihin Nilaini khan Aizawla tuisem tih changtlun dan tur sawi hoin department hotute leh khawpui chhunga tui sem viltu leh enkawltute an inrawnkhawm.
PHE hotute atangin thupui hrang hrang – tuisem chungchang; tui connection pek, pipe fit leh repair chungchang; water meter reading lak leh tui bill chungchang; tui tihthianghlim, thawktute leh mipui inlaichinna chungchang sawiin, an zirho a. Zawhna leh chhanna hun hman nghal zel a ni. Workshop neih zawh hian junior engineer leh a chunglamten workshop atanga thil thar bawhzui ngai leh ngaihven zui ngaite an sawi ho nghal a ni.
Workshop hmanpuitu PHE changtu deputy chief minister Tawnluia chuan PHED-a thawkte chu mipui nen inhnimhnai tak an nih avangin hawiher leh tawngkam thlengin fimkhur a tul tih a sawi a. Mipui rawngbawlna kawnga felfai leh tha lehzuala hmalak duh vanga workshop buatsaih chu thil lawmawm a ni tih a sawi.
Khawpui liante tui pek chungchangah tui lakna hnar a that tawk tawh loh avangin harsatna an tawk thin tih sawiin, tuihna humhalh kawngah mipuiin tan kan lak nasat a tul tih a sawi a ni.
PHE secretary Er C Lalremsiama pawhin Mizorama mihring cheng zinga zaa 28 vel Aizawl khawpuiah kan chen avangin tui thianghlim pek kawngah hma a zau bik a, theihtawp an chhuah chungin hmasawn zel tur leh mipui hnena service tha zawk pek an duh avangin hetiang hun hi an buatsaih tih a sawi. Aizawl chawm zo khawp tui an la pump thei rih lo tih sawiin, tuna SIPMIU hmalakna a hlawhtlin hun chuan hnianghnar taka chawm thei tur tui an pump thei dawn tih a sawi a ni. Workshop-a sawilan thenkhat:
# Urban Water Supply Scheme hnuaiah Mizorama notified town 28 te hnianghnar takin tui pek an ni tawh a, mamawhna a pun zel avangin a tihchangtlunna tur scheme dang dapin ngaihtuah thin a ni.
# Kum 2019-a bul tan Jal Jeevan Mission (JJM) hnuaiah thingtlang khua zawng zawnga in tinah tui connection pek tum a ni a, khuaa tui thianghlim lak thlen bakah in tinah tui connection a thlawna pek tur a ni. JJM hnuaiah tui connection 133060 chuang pek tur target Mizoramin a neihah connection pek tawh 118500 a ni a, hmabak 14460 vel hi kumin December ralhmain pek zawh tum a ni.
# Mizoram thingtlang khua zaa 89-ah tui connection pek an ni tawh a; zirna in zaa 80 leh Anganwadi Centre zaa 97-ah tui connection an pe tawh.
# Aizawl khawpui bikah PHED hnuaiah tui semtu mi 433 leh tui pump-tu 79 an awm a ni.
‘Tui pu’ te leh PHE hotuten tha zawka tui sem dan tur sawi
Get real time updates directly on you device, subscribe now.