Leivungin leilet a tihchhiat dan Agriculture minister-in enfiah

National Highway 54 kawngpui laih zauhna leivungin Serchhip kiang Mat lui phai, Zawlpui Zaua buh leh thlai chinna hmun a tihchhiat chu Nilaini khan Agriculture minister C Lalrinsanga’n a enfiah.
Zawlpuia loneitute nena an inkawmaah minister chuan, ramin hmasawnna kawng a zawh zel a, kawngpui pawh kan mamawh ngawih ngawih a nih avangin thawh a ngai a, heng hmasawnna hnathawh liante hian nghawng engemaw a nei leh thin a. Tuna a nghawng harsatna kan tawk hi a pawi hle, tiin a sawi. A dawnsawn dan tawk thiam a tul thu leh hmasawnna hnathawh vanga an harsatna tawh a hriatthiampui thu sawiin, an tawrhna sawrkarin a hriatpui a, ngaihtuah sak theih awm apiang an ngaihtuah sak tur thu a hrilh.
Leilet siam theih loha awm chhungkaw hnih – Thanhnuna leilet tuikawng siamna tur chu FOCUS atanga cheng nuai khat an pek tur thu leh Chawngsavunga leilet pawh a theih ang anga an ngaihtuah zui tur thu minister hian a hrilh a. Tuikawng harsatna kumtina kan tuar thin chu, solar water pump hmanga kawng awlsam zawk sawrkarin a dap mek thu te, solar pump supply hna a chhuah tep tawh thu leh man chawi loa awlsam taka tui neih dan a awm thuai dawn thu te a sawi. Ruahtui khawl dan zawn a tul tih a sawi bawk
Loneitute chuan, kawngpui laih tan hma hian an tuilak tibuai thei zawnga leivung paih lo turin an lo ngen lawk tawh tih an sawi a. Serchhip leh Keitum inkara kawng laitute hi leivung bunna tur – spoil bank pathum pek an ni a. Spoil bank hi dawl nghehna siam tura an ngen laiin, contractor lam hian an siam loa, tun hi an thleng ta tih an sawi.
Leivung dawl ngheh tak loh hian lui pahnih, Zawlpui leh Tuilut a khuap a, rei tak dawl ding zo loin June 29 khan a chim ta a, Sabereka Khuangkaih anga chim thut chu a tamin a chim chin a sang em em a. An tuilakna leh an hmunhma a tichhia a tih an sawi a ni. June 30 atang chuan lui pahnih hi pangngai takin a luang ve leh mai a tih an sawi a ni. Chhungkaw pahnihin kuminah leilet an siam thei dawn loa, chhungkaw pali tui lakna pipe a chhiaa, chhungkaw pakhat rubber tiak 3500 a chhe bawk.
Khawl lian hmanga leivung then tur engemawzat a awm avangin excavator-in ni 9 a thian tawh a, leivung paihna senso zualpui hi kawng laitu company lamin pek an inhuam niin an sawi.