I-League khelh dan thar tur duangchhuak

I-League khelh dan thar tur duangchhuak
Tunhnaia All India Football Federation (AIFF) executive committee mee-ting chuan thutlukna thar lian tak tak siamin, Federation Cup pawh Indian football calendar-ah an dahlut leh ta a, I-League kalphung thar an duanchhuah chu a langsar zingah a tel.
AIFF hian season tharah chuan I-League lamah team thar dang panga luhbelh se tiin a rel a, hei hi league khawng zawk dinchhuahna atana ruahman niin, team 16-in India rama league sang ber dawttu hi an khel tawh dawn a; I-League team 16-te chu team pariat ve vein zone hniha then tur a ni a, zone khata team tinte hian home leh away-ah match hnih theuh an khelh hnuah zone pahnih ve vea a sang palite’n playoffs an khel ang.
I-League khel tura dilna thehlut tawhte chu – YMS Finance Pvt Ltd (Varanasi, UP), Namdhari Seeds Pvt Ltd (Bhaini Sahib Village, Punjab), Nimida United Sports Development Pvt Ltd (Bengaluru, Karnataka), Concatenate Advest Advisory Pvt Ltd (Delhi) leh Bunkerhill Pvt Ltd (Ambala, Haryana)-te an ni.
He’ng bidder pangate inhuamna (bid) hi AIFF thuneitu sangin an zirchiang dawn a ni.
Thawhtannia AIFF thuchhuah chuan executive committee meeting-in kum ruk zet tihtawp a nih hnua Federation Cup tuaitharleh a nih chungchang hi tarlang tel bawkin, 2023-24 season atanga Federation Cup football tournament khelh tan leh a nih tur thu an puang.
Tunhnaia federation executive committee meeting chuan Karnataka State Football Association (KFSA) secretary Satyanarayan M chu AIFF deputy secretary general thar atan a ruat bawk.
He executive committee hian AIFF Vision 2047 plan chungchang ngaihtuah lian taka nei bawkin, chumi bawhzuina pakhat atan Federation Cup tihnun leh zai an rel a, 2023-24 season atangin India rama cup competition lian bera hlan chhoh an tum nghe nghe.
AIFF president Kalyan Chaubey a tuk lawka Indian senior men’s national team-in SAFF Championship final lama Kuwait an hmachhawn tur chungchang he meeting-ah hian sawichhuakin, SAFF huam chin pawn lam atanga team pahnih an sawmte chu team khawng zawk ni tura ngaih ni mah se a vawi-kuana atana title an lak theih a beisei thu a sawi a, Thawhlehni final-ah India hian penalty shootout-a Arab team hnehin he tournament-a team hlawht-ling ber an nihna an nem-nghet zui ta chiah nghe nghe a nih kha.
Chaubey hian SAFF Championship-a India hlawhtlinna leh kumina final an lut leh ta chu Indian football-in hmalam a panzia tichiangtu a nih thu sawi chungin Bengaluru inelna lian khelh hma lawka Imphal leh Bhubaneswar lama India team hlawhtlinna chuan Fifa ranking-ah pawh 100-na a luahtir tih leh Indian football-in kawng dik a zawh mek thu a sawi.
AIFF secretary general Shaji Prabhakaran pawhin Indian football agenda pawimawh tak tak an rel thu leh history thar siama I-League khel tur tihlen an rel tih a sawi ve bawk.