Liverpool captain Henderson chhuak dawn

Kum 2019 Madrid khaw final-a
Tottenham Hotspur hneha
Champions League trophy chawitu Liverpool captain Jordan Henderson chuan kum 12 chhung zet a khawsak tawhna Anfield club a chhuahsan ve tawh dawn tih social media kaltlangin a nemnghet a, tunlaia player langsar uaithla lamin an pankhawm ruih ruih mek Saudi Arabia lam nen sawizawm a ni nghal a, Al-Ettifaq chu a club thar ni ngei tura ngaih a ni.
Kum 33 mi ni ve tawh midfielder hi Saudi Pro League chuan a beh-bawm dang neuh neuh bakah sum lu pound maktaduai 12-in an dawr tih hriat a ni.
England international hian a Instagram account-ah a thih thlenga Red (Liverpool tantu) a nih tur thu a sawi a, hei hi inmangthana hma-hruaia ngaih a ni!
Henderson hian kum 2020 khan kum 30 mi ni chungin a vawikhatna atan Liverpool captain nghet nihna a chang a, khami kum khan kum 30 chhunga a vawikhatna atan a hoin Reds chuan Premier League title an sualchhuak nghe nghe.
Saudi Pro League nena sawizawm ni mek Henderson hian Merseyside lama a khawsak chhungin Champions League title bakah FA Cup pakhat, League Cup pahnih, Uefa Super Cup leh Fifa Club World Cup trophy pakhat ve ve a lakpui tling.
Tuna sawizawm a nih mekna club Al-Ettifaq hian ex-Liverpool captain leh Henderson-a team-mate hlui ni bawk Steven Gerrard chu manager atan an ruai a, ni rei vak loah Arab team nen hian inremna an ziah zui mai rin a ni.
Tunthla tir lam khan Henderson hian Liverpool squad rualin Germany ramah training camp zawm ve bawk mah se pre-season match lamah erawh a inlan lo a; tunah hian Saidi club leh Liverpool chu sum hmahruai pound maktaduai 12-in an inberem tawha tarlan a ni.
Liverpool hi Singapore lama pre-season match hnih khel turin an inbuatsdaih leh mek a, fixture tihfel tawhah July ni 30 hian Leicester City nen an intum ang a, August ni 2-ah Bayern Munich nen season thar inbuatsaihna game an khel zui leh ang.
English midfielder Henderson hi June 2011 khan Anfield club chuan Sunderland atangin pound maktaduai 20-in an lei a, Liverpool tana match 492 a khelh tawh atangin goal 33 a thun tling tawh a, assist vawi 57 a nei.
Henderson hian tunhnaia social media kaltlanga a video tarchhuahah Saudi Arabia lam nena an boruak hi a sawilang tel lo a, mahse, tuai, patil, neih inang inkawp tih ang chi (LGBTQ) lam thlawptu a nih avangin LGBTQ lam hian khawng taka chuti ang mite dodaltu ram Saudi Arabia nena sawizawm a ni chu an helh a, Liverpool LGBT+ fans group Kop Out telin LGBTQ pawlte hian inngaih-tuahtha leh turin an ngen hial a ni!
Tun dinhmunah Reds midfielder Fabinho pawh Saudi club Al-Ittihad nen sawizawm ni mekin, he team hian July ni 15 khan pound maktaduai 40-a Brazilian lei tumin Liverpool an dawr a, inbiakna la tawp lo mah se Fabinho hi chuan Arab ram a pan hmel chiah loh deuha ngaih a ni.
Tarlan tawh thin angin, kumin nipui insuan hun lai hian hming hraw pui puiin Saudi Pro League hi an zawm fel tawh a, chu’ng zingah chuan Reds striker hlui Roberto Firmino leh Chelsea keeper Edouard Mendy-te’n Al-Ahli lamah contract ziak fel tawhin, pound maktaduai 30-a Manchester City winger Riyad Mahrez senglut turin club pahnih an inbe fel tawh bawk.
Saudi club dang Al-Ittihad pawhin Real Madrid striker hlui Karim Benzema, ex-Chelsea midfielder N’Golo Kante an thlun fel tawh bakah Celtic atangin Portuguese forward Jota an lalut tawh a; Al-Hilal pawhin Portugal midfielder Ruben Neves chu Wolves atanga senglutin, Senegal defender Kalidou Koulibaly pawh Chelsea atangin an thlem-chhuak fel tawh bawk a ni.