Pro Fight-in beisei a pha chho leh dawn!

Mizoram Labour Link LPS Pro Fight 2026-in mipui hlut a hlawh nghal hle a; zan hmasa berah Lalremthanga Hmar chuan technical knockout-in Khamsuana a hneh a, Orient Goldsmith Fighter of the Night atan N. Lalhruaizela thlan a ni.
LPS Arena, Falkland-ah Thawhlehni zan khan tan a ni a, ruahsur karah mipui eng emaw zatin a hmunah an en a, inhnek hnuhnung ber flyweight huangah Sakawrdai tlangval Remthanga’n round hnihna a tawp hma chiahin Khawkawn boxer Khamsuana a hneh a, kar leh thawhtanni zanah Malsawmtluanga (Ratu) nen an intawng zui leh ang.
Pro Fight-a tel fo tawh leh Commedian Search atanga hriat hlawh kum 30 mi Remthanga’n mipui lawm a hlawh hle a, tawn hriat nei lo leh amah aia kum 10-a upa Khamsuana hmaah thiamna nei zawk a nihna lantirin round hnihna tawp lamah a hnek zawn a, a vei lama chiang taka a hmaia a hneksak hnuah Khawkawn boxer hnar a thi nasat avangin bawihsawm a ngai a ni. Round hnihna a zawh rualin referee George Lalsangzela’n inhnek titawpin technical knockout-in Remthanga a chak.
Fly inhnek dangah Tawipui South boxer Hruaizela’n round la vekin Johan Lalrindika (ITI Veng) lakah unanimous decision-in hnehna a chang a, boxing thiamna pangngai tak lantirin hmuhnawm takin an inhnek a, Pro Fight-a tawn hriat nei tawh Hruaizela’n a tir atanga a tawp thlengin a thunun a, thawhlehni zana boxer inlan zinga che tha ber lawman Orient Goldsmith Fighter of the Night a dawng a, September 19-ah boruak nei lian Remthanga leh Malsawmtluanga te inhneka chak zawk a hmachhawn ang.
Fly inhnek dangah Jacob Lalduhsaka (Chawntlangpui) chuan unanimous decision-in Vanlalpeka (Sihfa) a hneh a, inhnehtawk hle chungin tharum nei tha leh hneh na zawk Duhsaka’n round hnih lain a tawp lama che tha Peka’n round hnuhnung ber a la ve thung a ni.
Bantam-ah inhnek vawi hnih awmin Lalnunpuia (Rangvamual) chuan technical knockout-in Joseph J Romalsawma (Bualpui NG) a hneh a, round thumnaah second 55 chiah an la inhnek tihin Nunpuia’n nawr hnehin a hnek zawn a, chhang let thei lova Malsawma a inven ringawt avangin referee Malsawmsanga’n a titawp a ni.
C Lalruatfela (Tuirial) chuan Rosangliana (Tlangsam) lakah round tin la vekin 30-27, 30-27, 30-27-in a hneh. Kum 17 mi Ruatfela’n hnek pahin a chhaih kual a, Rosanga’n a tir atanga a tawp thlengin hnek fuh a harsat t luan.
Light-ah awlsam takin Israel Thangliana (R Vanhne) a chak a, a bitum tur Raymond Lalenkawla (Melriat) a inlan lo a ni. Inhnek dangah harsa takin Joseph Lalchawimawia (Saron Veng) a chak ve thung a, Remruatsanga (Kawrtethawveng) nen inhnehtawk taka round thum an inbeih hnuah split decision-in, 28-29, 30-27, 29-28-in a chak hram a ni.
Welter-ah inhnek vawi hnih tho awmin ITI Veng boxer Vanlalhruaimawia’n Ramhmingthanga Zote (Bairabi) a hnek hneh a, round hnihna laihawlah technical knockout-in a chak.
An inhnek rei telh telh a, thiamna nei zawk kum 23 mi Hruaia a chungnung tial tial a, round hnihnaah hnek zawnin Hmingthanga’n harsatna a tawk a, a ke a tihnat avangin a khel zawm thei lo a ni.
Dinthar tlangval VMS Tluanga’n unanimous decision-in VL Remruatfela (Mamit) a hneh bawk a, boxer pahnihin thiamna an nei sang lo ve ve a, ban sei leh tharum ngah zawk Tluanga’n 30-27, 30-27, 29-28-in a hneh a ni.
Middle-ah inhnek vawi khat awmin khaw inhnaih tak Vanlalsanga (Suangpuilawn) leh Vanlaldika (East Phaileng) an innuai a, round thum chhungin Sanga’n a hneh zawk tih lantir tluanin 30-27, 30-27, 30-27-in hnehna a chang a ni.