Delhi-a thuneitu sang ber pahnihte inbeihna chuan zual lam pan zelin Lieutenant Governor Vk Saxena chuan Chief Minister Arvind Kejriwal hnena lehkha a thawnah a lakah ‘mi kaihruai sual thei, thu dik lo leh hmuhsitna lam’ sawi lan nasat a ni tiin a sawi.
-- Advertisement --
“‘Tu te tan nge,’ ‘tu nge LG’ leh ‘Khawi atanga lokal nge’ etc te chu Constitution of India in bihchian chuan in chhang thei ang. Midang te hi chu chhan tlak an ni lova, a chhan chu titi hniam tak mai chauh buaipui an ni,” tiin Saxena chuan a ziak bawk a.
He lehkhathawnah hian Kejriwal an Lieutenant Governor-in Delhi zirtirtu Finland tlawh tura an tih a dang tih chu ngaih pawimawh berah neiin leh kar kaltaa AAP MLA rual amah hmuh tumte a hmu duh lo tih chungchang te a ni.
Saxena chuan Chief Minister leh a deputy Manish Sisodia te chu inbiakna neihpuiah a sawm thu a sawi a, mahse, an pahnih chauha kal lovin mi 80 vel an hruai tel a, chumi hnuah politics thil taka lain LG-in min hmu duh lo an ti leh si a ni, a ti a.
“Chhun thingpui inpui che u a, lo mikhual che u ka duh tehreng nen” tiin Saxena lehkhathawn chuan a tarlang bawk.
“Hun chawpchilh takah leh in thil ngiat rang tak karah mi 70-80 vel lo mikhual thei che uin ka awm lo hrim hrim a, awmzia pawh a awm bawk loh hmel a ni,” a ti bawk.
Lieutenant Governor chuan, “Khawpuiin development issue lamah harsatna nasa tak a tawh lai a, lungawi lova thui tak kala harsatna te fing taka chinfel dan zawng lova a pawngpawrh zawnga in kal hi mak ka ti bawk,” tiin a sawi bawk.
Kejriwal chuan Delhi assembly ah Saxena chu na taka sawiselin a homework enfiahtu headmaster angah ingai tiin a sawi a.
Lieutenant Governor chuan issue thenkhatte chu Kejriwal bawhzui tura hrilh hriata awmze nei leh tha zawka a chinfel theih nana hrilh mai a ni tiin a sawi bawk a.
“Headmaster angin ka che lo va, ngeiawm takin ka chungchang i sawi a ni” tiin Saxena chuan Kejriwal lehkha a thawnah chuan a tarlang bawk.
LG chuan tun hnai kum riat chhungin Delhi education department hnenah ram pek an ni chungin school thar pakhat pawh sak a ni lo a ti bawk a. “Classroom sak belh leh toilet awm zat chhiar ringawt chu school thar hawn nena khaikhin chi a ni lo,” a ti bawk.
AAP tena Delhi-ah zirna lamah hmasawnna nasa tak an awm tia an tlangaupui chungchangah zirlai tam tak te hmasawnna chu a bulthut chauh a ti thung.
Delhi school naupang zingah “math leh science hlauhna” nasa tak a thleng a, class 12 thlenga science zir tlemte chauh an ni, a ti bawk.
Saxena chuan Finland-a zirtirtu te training chu a khap emaw dodal miah loh thu sawiin sum sen tlem zawk dan ngaihtuah ni se a ti mai chauh zawk tiin a sawi bawk.