October ni 2-ah LPS Pro Fight tan dawn
October ni 2-ah LPS Pro Fight tan dawn
LPS Arena, Falkland Veng, Aizawla LPS Pro Fight nghah tur chu October ni 2, 2023-ah tan a ni dawn a, nikuma weight hrang hranga champion-te seed pek vek an ni ang.
Pro Fight kalphungah champion laiin title a humhim theihna tur hun tha siamsak a ni thin a, amah cho thei tur zawnnaa tlang nen a tawp Title Fight-ah an intawng thin a ni.
Nikum khan weight pangaah title an inchuh a, fly-ah Laldinsanga (Lunglei), bantam-ah Lalrinngheta (Tuipui), feather-ah Lalrosangzuala (Chaltlang), light-ah Vanlalawmpuia (Khuangthing) leh welter-ah C. Lalhruaitluanga (Chawngtlai) an champion.
Tun tumah weight panga tho awm dawn mah se tihdanglam a ni a; nikuma awm featherweight nuaiboin nikuma tel lo middleweight telh a ni ve thung.
Hei vang hian khairual taka champion laite kalpui a nih theihna’n a tawp Title Fight-ah chauh ni loin khawi round atangin emaw an khelh vek a ngai dawn a, an telna weignt-ah seed pek vek an ni ang a, boxer tel an tam dan azirin an khelh hun tur siam fel tur a ni.
August ni 15, 2023 atangin LPS Office, Zarkawtah pakhat Rs. 10 zelin boxer entry form lakchhuah theih a ni dawn a, September ni 20 thleng thehluh theih a ni ang.
November thla tir lamah zan hnih awh Title Fight buatsaih turin ruahmanna an siam fel a; Title Fight-a tel ve lo tur professional inhnek dang zehtel a ni dawn a, chutah chuan Pro Fight champion lo ni tawh pahnih NT Lalbiakkima leh HC Johnkenty Vanhlimpuia bakah F. Zoramchhanate tan hun siamsak an tum.
Nikum khan champion lawmman atan medal lian awrhtir an ni a, kuminah cham-pion kawnghren hlan vek a ni ang. Kum kal taah semi-final atangin profe-ssional inhnek chhinchhiahna boxrec-ah ziahluh vek a ni a, tun tumah Title Fight chauh ziahluh a ni ve thung dawn a, a hma lam inhnek zawng zawng Pro Fight kalphung pangngai anga kalpui a ni ang.
Hetih lai hian mipui 1,000 chuang len theihna tura sak mek LPS Arena zawh a la ni lo a; Pro Fight tan hun October ni 2-ah a nih dan tur taka hawn hman a ni dawn lo tih a chiang bawk a, mahse, inhnek thlen theihna turin buatsaih a ni dawn tho a ni.