Australia leilungah pawh Sindhu tlo rei leh lo!

Australia leilungah pawh Sindhu tlo rei leh lo!
Kumina chet fuh tluan tak tak nei hlei thei lo India ace shuttler PV Sindhu chuan Sydney khawpuia badminton tournament lian Australia Open 2023 khelh mek round of 16-ah Ningani khan nuamsaa a chipui Aakarshi Kashyap hnehin quarter-final lut bawk mah se American shuttler Beiwen Zhang lakah minute 39 lek chhungin a tlawm fel leh der!
Sindhu hian season kal laia a vawilina atan semi-final luh tumin Chinese-born American Zhang chu nimin khan a hma-chhawn a, kumina a thlensan theih loh rau bawk chang zui lehin kum 33 mi lakah hian 12-21, 17-21-in a tlawm a, US do-llar 420,000 Super 500 tourna-ment atangin a tla fel leh ta a ni.
Tunhma lama Zhang-i nen vawi 10 an lo intum tawhah 2019 world champion Sindhu hi vawiruk chakin, Zirtawpniah erawh a hneh fo tawh lakah a tan a phet tlat a, August 21-27 chhunga Denmark khawpui Copenhagen-a khelh tur World Championships atan pawh inrintawkna lian tak neih a harsat chho thei mai sawnin alang!
Two-time Olympics medallist Sindhu hian Ningani khan 21-14, 21-10-in a chipui Kashyap a paltlang a, a hma round-ah Indian player dang Ashmita Chaliha pawh a lo hneh tawh a, season bul tan fuh lo tluang zet Hyderabadi hian Australia leilungah lei rem a rap tan dawn em ni ang tih ngaihtuahna a pian tan mek laiin a hneh fo tawh world number 12 Zhang a ngam lo leh ta tlat a ni.
Kumina BWF tournament vawi 12 a khelh tawhah Sindhu hian tum ruk zet first round a paltlang zo lo a, Japan Open 2023-ah pawh khan round of 32-ah a tawp ringawt bawk.
Season kal laia chetfuh a harsat em avangin August thla tira BWF world ranking tharah pawh tlahniam duai tawhin 17-na daih a luah a, thangkhat lian zet chhunga a hniam ber tum niin, tunhma lama a ranking sang ber chu kum 2016-a pahnihna dinhmun a luah kha a ni.
Kumin kumtir lam khan Sindhu hian a coach chhawr lai Korean Park Tae-Sang banin SAI coach Vidhi Chaudhary nen an thawkdun zuai a, tunah tak hian a coach thar Muha-mmad Hafiz Hashim hnuaiah training kalpuiin, 2003 All England champion Hashim nen pawh eng ruai an ang zo leh ta lo phawt!
Australia Open 2023-a Indian inlan dang pakhat HS Prannoy chuan nimin mipa singles inkhel result tarlan hman lohah top seed Anthony Ginting of Indonesia tumin, 2021 World championships silver medallist Kidambi Srikanth leh a chipui Priyanshu Rajawat inhmachhawn result pawh tarlan hman a ni ta lo.