Parallel department…

Rin ngil pahnih hi insuihfin thei si lo, inthen thei bawk si lo, inhlat deuh tur emaw, inhnaih deuh tur emaw pawha inpan thei si lova inhmu pha reng sia hma lam pana an kal dun ngar ngar chuan, chu chu ‘parallel’ tih a ni.
Mizoramah pawh hian department thenkhat hi chu rin ngil parallel anga kal ngar ngar an awm a, chung zingah chuan agriculture deptt leh supply deptt (FCS&CA) te hi an ni, a tih theih awm e.
Mahnia kan inrelbawl hran ve tak hnua sawrkar hnuaia department din hmasak pahnih agriculture leh supply department hian tha takin an tihtur chu an thawk mawlh mawlh reng mai a. Pakhatin buh a thar reng a, pakhatin state dang atangin buhfai a chaw lut reng bawk a. Hetiang hian an kal dun ngar ngar a, tun thleng hian inthen thei si lo, insuihfin thei si lovin an kal dun ngar ngar reng mai a ni.
Buh thar chhuah pung ve deuh thin mah se, FCI lamah buhfai quota kan tlakhniamtir thei chuang hlei law. Ram hruaitute lah hian, mipui lam mawhpuhna ang dawn dawna ngaih theih turin, ‘kum khatah thlahnih tla bak buh kan thar chhuak lo’ an ti dum dum reng a. Buh kan thar chhuah tam loh avangin sawrkarin kan mawng a beng dawn emaw lo ti hman te pawh mipui zingah a awm theih rum rum awm e.
‘Thawk rawh u, taima leh thawkrim chu an hlawhtling’ kan inti a, kan infuih thin a, a dik e. Thawh tur siam te, thawktute chhawmdawl (facilitate) te hi sawrkar tihtur, mipui ten sawrkar an siam chhan a ni. Tih tak emah chuan kuthnathawktute hian an remhriatna leh an tha leh zung sum leh pai sengin rim takin an thawk tak meuh meuh a, an thawkrim thin khawp mai; mahse, an thawhrim rah hi a hlawk thei si lova, an chawlhsan thei bawk si lo a, tun dinhmunah hian kan la awm reng mai a ni.
Department dang pawh, thawhdunna (coordination) nei tura ngaih, mahse mahni kal kala kal ngawr ngawr hi an awm; entir nan- AH&Vety department leh horticulture/agriculture te hi. Vety lamin ran an vulh a, ran chaw a siam a, mahse ranchaw siamna hmanrua (raw material) chu state dang atangin a chawlut leh hlauh a, horti/agri lam nena inthlunzawm theih a ni.
Kan state sawrkar thinte hian mipui dinhmun chawisan hi ram economy dinhmun chawisanna a ni tih hi an hre ve ta lo em maw tihturin kan state hi kan hawi kual vel rei ta deuh niin a lang. A ngaihna kan hre lo pawh ni lovin, kan ti duh lo te hi a ang rum rum tawh mai a ni.