CANCER: Mipa-ah pumpui; Hmeichhiaah chuap

Mizo mipa teah pumpui cancer an tam ber a, hmeichhiaah chuap cancer an tam ber. Mizoram chu India ram pum puiah cancer vei tam berna kan ni a, tlak hniam lam pan lovin san lam kan pan char char bawk.
Hei hi nimina Population Based Cancer Registry (PCBR) Mizoram buatsaih workshop neihnaa tarlan dan a ni a; PCBR kum 20 chhung zirchianna a ni.
PCBR hi chuan cancer vei zingah eng cancer nge tam tih data/information min hrilh a; hospital record bakah hospital pawn lam (population based) a ni mai a. Heng cancer (pumpui, chuap etc.) te hi eng vanga lo awm nge tih zirchianna (research based) erawh a ni hran lem lo niawm tak a ni.
Mipui tana pawimawh ta chu, ‘pumpui cancer tam lam’ aiin, ‘eng vanga pumpui cancer chu lo awm thei nge a nih?’ tih lam hi a ni. Mizorama cancer tam chhan hi, zuk leh hmuam kan uar lutuk vang te, kuhva kan ei nasat vang te, thil rep kan ei nasat vang te, mawm leh chawhmeh kan-ro (deep-fried) kan ei nasat vang te leh a dangte pawh, niin sawi a awm thin a; hei hi research-based report a nih chiah loh chuan mipuiah a tlak nat dan a danglam deuh awm e.
Hetih rual hian, Mizorama cancer a san em em chhan hi research-based kher lo pawhin, a chunga kan sawi zuk leh hmuam, thil rep, deep-fried etc. te khi ‘lifestyle risk factor’ an ni ang tih chu rin a harsa lovang.
Mizoten kan tlakchham lianpui pakhat chu, hriselna ngaipawimawh lam hi a ni. Ei leh in kawngah, kan taksa tana chaw tha aiin, kan taksa huat tur zawng hi kan seng lut uar zawk zel ni maiin a lang. Chumi awmzia chu, kan ei leh in te hi kan taksa tan a tha nge tha lo tih lam aiin, kan hrawkin tui a tih zawng a nih chuan kan lem duak duak zel mai ni berin a lang.
Hei kan dinhmun a nih mek avang hian, ei leh in hrisel leh lifestyle dik leh tha zawk kan neih theih nan, he lama mipui inzirtirna hi, ruihhlo do kan ngaih pawimawh ang bawk hian, ngai pawimawh ve tho ila, ‘mipui hriselna beihpui thlak’ te hi kan kalpui theih chuan tun atanga kum 5/10 hnuah chuan result tha tak a awm ngeiin a rinawm.