State Assembly-in forest dan thar hman loh rel dawn

India sawrkarin forest humhalh lai a duh dan anga hman theihna tur dan thar a siam chu Mizorama hman a nih lohna turin State Legislative Assembly chuan thu tihtluk a tum dawn nia sawi a ni.Centre For Enviroment and Social Justice (CESJ) Mizoram buatsaihin Inrinni khan Forest Conservation and Biological Diversity (Amendment) Act 2023 hnuaiah India danpuia awm Article 371G-in Mizoram a hum thei dawn em, tih zirho a ni a. Indian Forest Service (Rtd) Lalthlamuana Pachuau chuan Forest Conservation & Biological Diversity (FC&BD) Amendment Act hi a sawifiah a. Jawaharlal Nehru University Delhi atanga Article 371G chungchanga Ph.D zo Dr Joseph Lalfakzuala chuan Article 371G a sawifiah bawk.
He hun hmanpuitu Mizoram MP K Vanlalvena chuan ramngaw chu khawvel hmundangte neih ve loh Mizoramin kan neih rohlu a ni, tiin, kan ramngaw zau tak neih mek chu a humhalh kawngah mipui kan pawimawh tih a sawi. Forest Conservation Amendment Act 2023 chu a thlawp lo tih sawiin, Mizorama hmasawnna hrang hrang avanga kan ramngaw neih that sa vah chereu a ni tur chu a duh loh tih a sawi a ni.
Senior advocate, chief minister legal adviser C Lalramzauva chuan Mizoram sawrkar ngaihdan leh tuna dan thar leh Article 371G inkungkaihna a sawi a. August 22 leh 23-a Mizoram Assembly thutkhawm hunah sawrkar chuan FC&BD Amendment Act 2023 hi Article 371G tlawhchhanin Mizorama hman a nih lohna tur resolution putluh an tum tih a sawi a ni.
CESJ working chairman Vanramchhuangi chuan kan environment dimdawi nachang kan hriat loh avang leh sawrkarin environment humhim hi development a hmakhalh tir vangin kan environment-in a tuar tih a sawi a. Tunhnaia hmasawnna ruhrel lian hrang hrang, a bikin NHIDCL kawng laihin dan zawng zawng bawhchhiaa kan environment an tih chhiat dodal a nih mek laiin, centrala BJP sawrkar chuan FC&BD Amendment Act 2023 a pawm tih a sawi a ni.
He dan siamthat hi Mizoram tan dan tha lo tak, ram neitu kan nihna min chhuhsak theihna leh kan environment tichhe vek thei a nih avangin Mizo mipuiin tangruala kan do a ngai tih sawiin, FC&BD Amendment Act dodal turin mipui, a bikin thalaiten hma la tura an ngen nasat avanga he zirhona hi buatsaih an nih thu a sawi.
Academician, lawyer leh political party hrang hrang aiawhten FC&BD Amendment Act 2023 chu Mizoram tana a that loh dan an sawi ho zui a. He dan dolet tura tanrual a pawimawh zia, political party nihna dahthaa kohhran leh civil society nen kan zavaia tan ho tul zia bakah kan environment humhim tura hmasawnna awmzia dik tak kan ngaihtuah a ngai tih te an sawi a ni.

Forest dan siamthar hnuaia Mizorama himna tur ngaihtuaha kalkhawmten resolution pahnih an pawm:

# Adviser to chief minister-in The Forest (Conservation) Amendment Act 2023 leh Biological Diversity (Amendment) Act 2023 hi Mizoramah kan hman ve lohna’n Mizoram State Legislative Assembly-ah pawm loh tur thu putluh an tum thu a sawi hi lawmawm kan ti hle.
# The Forest (Conservation) Amendment Act 2023 leh Biological Diversity (Amendment) Act 2023 chungchangah Mizoram humhim a nih theihna’n a tul ang zela kohhran, civil society leh sawrkar tanghoa hma lak ni rawh se.