Kalphung hlui aiin ZMP kalphung thar chhe zawk – MNF

ZPM-in kalphung thar, mipui sawrkar an zawrh mek chu anmahni ngeiin an bawhchhe mek zel tih MNF chuan an sawi.
MNF Gen. Hqrs. Media & Publicity Department hotute sawi danin, ZPM MLA Dr Vanlalthlana chuan corruption do turin an inpeih tawh a, a ngaihna pawh hre turah an inngai, tia a sawi thu sawichhawngin, amah berin a MLA fund a hman danah eirukna leh hlemhletna mai bakah dan bawhchhiatna a inphum ngeiah an ngai tih an sawi. MLA fund chu veng aiawh tura mipui thlan local council-te kutah a dah mang lo tih sawiin, local council-te kuta a dah chhun pawh ZPM Unit leh Thalaiin an thawk tlangpui tih an sawi.
MLA fund chu danah political party-in an thawh phal a nih loh laiin, Dr Vanlalthlana bial Aizawl North-II ah chuan ZPM party deuh hlir a thawh tir bakah Aizawl North Development Agency din chawpin, an party mite a vur char char tih an sawi. ZPM chu kalphung hluia kal an tihte aiin an buai zawk tih MNF Media & Publicity general secretary VL Kroshnehzova chuan sawiin, “Kawng tam takah an kalphung thar hi kalphung hlui nia an sawi aiin a chhe zawk. An sawrkar lo chung pawhin, party mi bil an invulh nasa hle a, dan pel hialin an kal duh a ni,” a ti.
ZPM hrechiang hmasa apiang an bang zel tih sawiin, anmahni leh an kalphung dik tak hrechiang ve lo mipui bum an tum tih a sawi a. ZPM bumna thang atanga Mizo mipui tang mekte talchhuak a, kalphung nghet MNF-a hnam thinlung pu zawng zawngte lawi turin an sawm tih a sawi a ni.