Chelsea in Wimbledon an lehthal

August 30, Nilai zan khan Carabao Cup round 2 khelh chhunzawm a ni a, Chelsea chuan Stamford Beidge-a an mikhual AFC Wimbledon lakah si an phurh hmasak zet hnuin hnehna an chang let a, mualpho an pumpelh thei hram. Inkhel dangah EPL a khelh thum chhung tlawm zawn tawh Everton in hnehna an chang nawlh a, third round an lut ve bawk.
Chelsea hian Stamford Bridge-ah League Two team AFC Wimbledon an mikhual a, awlsam taka chak thei tura ngaih an ni naa in harsa takin hnehna an chang thei hram chauh. League Two team Wimbledon hian beisei phak bakin club lian Chelsea lakah bul an tan a, minute 19-na lekah penalty an hlawhchhuak. He penalty hi James Tilley chuan a pet goal a, hmahruaina goal a thun.
An mahni aia team tenau zawk fe Wimbledon lakah goal chhuah hmasa zawka an tan hnuin Blues in goal thun tumin thapui an chhuah a, an mikhualte an nawr ta hle. Kawng hrang hrangin an khingpuite an thunun zui a. Goal erawh an thun mai thei bik lo thung. Chawlhlawk dawn hnaih minute 45+1 ah penalty atangin Noni Madueke chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Chelsea an khel tha chhunzawm a, goal thun erawh an harsat zui tho thung. Goal thun ngei tuma an khingpuite an nawr rah an seng a, hun tawp dawn hnaih lamah goal an thun ta nge nge. Minute 72-naah midfielder Enzo Fernandes chuan hma an hruai letna goal a thun ta nge nge. Fernandez goal thun hi hun tawp thlengin an venghim a, an mualah 2-1 a hnehna chang hramin third round an lut ta a ni.
Nilai zana inkhel dangah Premier League-a bul tan chhe tak Everton chuan Mimualah Doncaster Rovers an hmachhawn a, si an phurh hmasak hnuin hnehna an chang let thei hram a, third round an inhlangkai. Everton tan hian an forward thar Beto chuan goal a thun.
League Teo mawngphah Doncaster Rovers in EPL mawngphah Everton an hmachhawn tum hian goal lut a awm lawk thei lo. First half tawp dawn hnaih minute 44-naah Doncaster tan Joe Ironside chuan hmahruaina goal a thun a, he goal hmang hian hun rei tak chhung hma an hruai.
EPL hnuai pathumnaa awm Doncaster lakah si an phurh hnuin chawlhlawk hnu lamah Everton in an si phurh sut ngei tumin tan an khawh a. Hun tawp dawn hnaih lamah goal hnih an thun. Minute 72-naah Udinese atanga an lak thar Beto chuan a club thar tan a goal hmasa ber thunin an si phurh a sut. Beto goal hmangin inrintawkna sang zawk an nei a, na zawkin an khingpuite an nawr zui theih phah. Ngam taka an khingpuite an nawr rah an seng a, hun tawp dawn hnaihah goal an thun belh leh. Minute 88-naah Arnaut Danjuma chuan hma an hruai letna goal a thun a, 2-1 in an chak zui ta a ni.
Inkhel dangah Blackburn Rovers chuan 8-0 ngawtin Mimuala an khingpui Harrogate Town an sawp a, nuamsa takin third round an lut. Hetihlai hian Nottingham Forrest chu City Ground-a an mikhual Burnley lakah si khat faiin an vanduai a, third round an lut zo lo bawk.
Nilai zana inkhel dangah EPL club Shheffield United chu Bramall Lane-a an mikhual Lincoln City lakah an mualpho a, third round lut zo lovin an tla. Bramall lane-a inkhelah hian hun pangngaiah goal lut a awm thei lova, penalty shootout hmangin chak zawk zawn chhunzawm a ni. Penalty shootout ah hian Lincoln City chuan 3-2 in hnehna an chang ta a ni.
Carabao Cup second round khelh zawh a nih rualin third round-a inhmachhawn tur pawh fel zui nghal a ni a. EPL club lian pahnih; Manchester City leh Newcastle United te an inhmachhawn dawn. Manchester United in Old Trafford-ah Crystal Palace an mikhual ang a. Arsenal leh Brentford an in hmachhawn laiin Liverpool in championship club Leicester City an hmachhawn ve thung ang. Carabao Cup third round hi September 25-ah khelh a ni ang.