Sawrkarin jail thawm that a tum lo – AAP

Mizoram sawrkarin jail a ngaihsak loh danah jail tangte chu thi vek mah se pawi an ti lo emaw tih hial tur a ni tih Aam Aadmi Party Mizoram chuan an sawi a. Jail thawmthat tumna a awm lo tih an sawi.
AAP Mizoram hruaituten RTI atanga chhanna an dawn an sawi danin, tun sawrkar kal mekah Mizorama jail thawmthat tumna a awm lo a, jail tang thei tur aia tam an awm mek tih an sawi. Mizoram puma jail hrang hrangah mi 1386 awm thei tura ruahman a nih laiin, 2125 an tan mek thu leh thawktu 429 awm tura ruahman a nih laiin, thawktu 280 chiah an awm thu an sawi.
Chanhai zawk leh aw neilote tana ding an nih thu AAP hian sawiin, Mizoram sawrkar chu jail dinhmun enfiah tur leh tun ai nasaa thuamtha turin an ngen tih an sawi a. Central Jail leh Champhai District Jail chu tang tam zualna a ni, tiin, Central Jail-a mipa tanna bik chu mi 438 awm thei tura ruahman a nih laiin 939 an awm mek a, hmeichhe tannaah mi 96 awm thei tura ruahman a nih laiin 301 an tan mek tih an sawi a ni.