Mizoramah rul chi hrang hrang 73

Mizoramah rul chi hrang hrang a awm a, a zirna lama hriat chian tawh chinah rul hi chi hrang hrang 73 a awm.
Mizoram University-a zoology department-a rul chungchang zirna lama thawh hlawk tak Dr HT Lalremsanga chuan Mizoramah rul chi hrang hrang 73 a awm thu a sawi a, mihring chuk chi a tam lo tih a sawi bawk.
A sawi danin, rul chi hrang hrang 73 zingah tur hlauhawm pai chi rul 15 a awm a, chung zinga chi thum emaw chi li emaw chu mihring chuk thin an ni.
Mihring chuk nasa bera ngaih chu rultuha a ni a, thihna thlen khawpa mi chuk nasa chu khuavangrul a ni tih a sawi. Rulin mihring a chuk chhan hrang hrang a awm a, an sawi danin, mihringin an tina dawn emaw tiin mahni inven nan mihring an chuk thin tih te, dan chepa an awmin inven nan mihring an chuk thin tih te, an thi tur chalchang thinrimin mi an chuk thin tih te an sawi.
National Action Plan for Prevention and Control of Snakebite Envenoming hnuaiah ruk chuk a thlen palha thu thlenna tur Integrated Health Information Platform (IHIP) a awm a, hetah hian kuminah in-report zat chu 451 a ni tawh.
2025-ah khan kum tluanin rul chuk case 488 a awm a, kuminah thla kaw tlin hmain chutiang zat thuak chu Mizoramah a awm tawh.
Hei hi IHIP lama report an dawn zat a ni a, IHIP-a report lo, damdawi ina kal lo, rulin a chuk mi dang an awm nual thei bawk tih thu dawn a ni.
IHIP enkawltute chuan rul chuk tuartu chu damdawi ina hruai vat tur a nih thu an sawi a, darkar 24 chhungin rul turin mihring taksaa a thawh dan ena enkawl nghal tur a nih thu an sawi. Public Health Centre leh District Hospita tinah rul tur thahna tia sawi ‘Anti snake venom’ dah a nih thu an sawi a, he hi damdawi inah medical officer-in a pek tur a nih thu an sawi.
Mithiamte chuan Mizorama rul tur neiah mi a chuk vanga thihna thlen nghal a awm ngai lo niin an sawi a, inekawl that loh vanga thihna thleng thin a awm zawk niin an sawi.