Minister of state a nihna atanga chawlhtir a nih hnuah Dr K Beichhua chu MNF-in member a nihna atangin an chawlhtir.
Dr Beichhua hian bial a fang mek a, Chhuarlung atanga a haw kawngah, Nilaini chawhnu lamah Niawhtlanga vantlang inkhawm neia hun an hman laiin MNF member a nihna atanga chawlhtir a nih thu hi social media lam atangin an hria tih thu dawn a ni.
-- Advertisement --
Dr Beichhua hian party atanga chawlhtir a ni chu mak a tih thu leh, MNF duh lohzawnga a awm a hriat loh thu a sawi a, minister a nih loh hnuah pawh MNF hruaitute sawiselna emaw lungawi lohna emaw a sawi lo tih te a sawi.
A kal zel dan tur chu ngaihtuah chawp a ngaih thu a sawi a, bial mipuite nena inrawn a ngaihtuah chawp dawn niin a sawi.
Tun hnaia Mara District MNF president a nihna atanga chawlhtir C Lawbei chuan Dr Beichhua hi MNF atanga a chhuak a nih chuan MNF atanga zuitu an thahnem dawn niin a sawi a, “Pu Beichhua a chhuak a nih chuan Siaha District-ah chuan MNF chu lianpuiin a phel ang. MNF-ah hian a tlem berah a chanve chuan Pu Beichhua an zui ang,” a ti.
Mara ramah BJP an lian ber niin a sawi a, MNF atanga chhuak an tam chuan MNF an lian lo ang tih sawiin, a luhna party-a lo awm sate leh MNF atanga chhuakte inbelhkhawm chu an lian lo thei dawn lo tiin a sawi.
“Bial a fang a, minister a nih lai aiin mipuiin an lawm a, minister ni chunga bial a fan lai aiin a kalnaah mipui an tam zel,” C Lawbei chuan a ti.
C Lawbei hi Dr Beichhua nen hian an zin dun a, nikum kum tawp lama Mara Autonomous District Council-a MNF leh Congress thawh dunna sorkar paihthlak a nih lai vela Siaha District-a MNF president niin, sorkar a tlak hnuah president a nihna atanga chawlhtir niin, chumi hnuah Dr Beichhua pawh minister a nihna atanga chawlhtir a ni.
Dr Beichhua rual hian Mara Autonomous District Council chairman N Viakhu pawh MNF atanga chawlhtir a ni a, MNF dan kalha cheah puh an ni. C Lawbei erawh chawlhtir a ni lo.