Novak Djokovic-a’n Djere a lehthal

US Open 2023 khelh chhunzawm zel a ni a, inrinni zing khan Novak Djokovic chuan Laslo Djere lakah set hnih a hloh hmasak zet hnuin hnehna a chang let a, last 16 a lut. Inrinni zan khan champion lai Carlos Alcaraz chuan Dan Evans a hneh a, last 16 a lut ve bawk.
Keini huna zirtawp zinga inlan Novak Djokovic chu a hnampui Laslo Djere lakah chhe takin bul a tan a, set hmasa pahnih a hloh. Nole hian ni danga a khelh dan a phak lova, Djere a khel tha ropui mai bawk si a, Grand Slam-a vawi 23 champion tawh Djokovic hi a tlak a rinawm hman viau. Dinhmun chhia leh khirh taka a din laiin Djokovic ropuina a lang nawn leh a, a khingpui a sawp let a, set thum la zawnin hnehna pawimawh a sualchhuak.
Djere hian player ropui Djokovic lakah tha chungchuang takin bul a tan a, kawng hran hrangah chak phuin a inlan. Set khatna leh set hnihnaah vawi khat ve ve break a nei a, a serve a hum theih zel bawk vangin set hnih a la zawn. Set hnih a lak zawn vangin a vawi khat nan Djokovic a hneh a rinawm hman hial tawh. Dinhmun tha taka a din laiin Djokovic er let a tuar lova, uiawm takin a chak zo lo.
Set hmasa pahnihah beisei phak lo takin inlan bawk mah se set thumnaah erawh thil a inthlakthleng ta hlawk thung a, Djokovic a khel tha thut. Djokovic hian break a nei zawn a, set thumna leh set linaah game khat ve ve chiah a hloh a, awlsam takin set a la zawn. Dicing set-ah tha zetin bul a tan leh a, a serve hum zo lo bawk mah se break a nei zui leh zat a, game thum chiah hlohin set a la nawn leh a, 4-6, 4-6, 6-1, 6-1, 6-3 a hnehna changin last 16 a inhlangkai. Set hniha a hnufual hnuah Djokovic hian hnehna a chan let vawi riatna a ni a. Hei hian player paukhauh, beidawng ve mai mai ngai lo a nihzia a lantir.
US Open-a vawi thum champion tawh Djokovic hian last 16-ah Croatian qualifier Borna Gojo a hmachhawn leh ang. Djokovic hmaa fiahna hautak hmachhawn tur Gojo hian third round-a a khingpui Jiri Vesely chu 6-4 6-3 6-2 in a hneh a, last 16 a inhlangkai.
A elpui lian Djokovic a chak laiin champion lai Carlos Alcaraz chuan inrinni zan khan British no. 1 Dan Evans a hmachhawn a, set khat hloh chungin hnehna a chang.
Alcaraz hian Evans lakah bul a tan tha a, harsatna lian tawk lovin set khatna a la. Set hnihnaah Evans-a’n bul a tan tha ve thung a, break a nei nghal. Break nei nghalin, 3-0 a hmahruai thei dinhmunah ding mah se a serve hum zo lova, a talbuai chhunzawm. Ngam taka a khingpui hmachhawn in, khel tha thawkhat viau mah se hun pawimawhah a chesual leh thin a, game a hloh leh nghe nghe thin. Set hnih a hloh zawn hnuin Evans hian set thumna chu harsa takin a la hram a. Set linaah erawh a dingchang zo lo va, Alcaraz lakah 2-6,3-6, 6-4, 6-3 in a tlawm a, last 16 a lut zo ta lo a ni.
Dan Evans vaw tlatu Carlos Alcaraz hian Italian Matteo Arnaldi a hmachhawn zui leh dawn a, zanin zan laiah an inhmachhawn ang. Kum 22 mi Arnaldi leh Alcaraz te hi an vawi khat intumna tur a ni a, kum naupang, kum inthlau lo tak an nih vangin inkhel hmuhnawm an lantir ngei tura ngaih a ni.
Inrinni zana inkhel dangah Daniil Medvedev, Jannik Sinner leh Alexander Zverev ten hnehna changin last 16 an lut ve bawk.