City leh Haaland an kal zel

Inrinni zana English Premier League khelhah champion lai Manchester City chuan 5-1 in Fulham an hneh a, EPL club zingah season thara chak vek awmchhun an ni. Fulham an hneh tum hian Erling Braut Haaland chuan hattrick a siam a, EPL-ah goal 50 thawkchhuak rang ber record thar a siam bawk. Inelna hrang hrangah dan theih lohin City leh Haaland an inlan a, an kal zel.
Champion lai City hian Etihad Stadium-a an mikhual Fulham lakah an khel tha viau a, inkhel hmuhnawm an lantir. Minute 31-naah Jullian Alvarez chuan Haaland siamsak atangin hmahruaina goal a thun. Team lian zawk lakah goal chhuah mah se Fulham hian na takin an nawr let a, goal an thun ve nghal zat. Goal an chhuah atanga minute hnih hnu lekah Tim Ream chuan goal thunin an si phurh a sut. 1-1 a nih hnuin Nathan Ake chuan minute 45+5-ah City hmahruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah City an khel tha chhunzawm viau a, goal thum an thun zui leh. City goal thum thunte hi Haaland thun vek a ni. EPL-ah record hrang hrang lo siam tawhtu Haaland hian minute 58-naah an goal thumna a thun a. Minute 70-naah penalty pet goal in, an goal lina a thun zui leh. Goal hnih a thun hnuin goal a luh belh thei lawk lo va, hun pek belhah Haaland a inlar nawn leh. Goal hnih thun tawh Haaland hian minute 90+5-ah hattrick a pui tlin a, an goal ngana thunin an chakna a nemnghet. Inkhel tawp zui a, City chuan 5-1 ngawtin hnehna an chang a, point 12 hmuin EPL hmahruaitu an ni.
Fulham laka hattrick a siam bakah assist a neih vangin Haaland kha EPL-a goal 51-ah a inrawlh tling chiah. EPL Season khata goal thun hnember record leh EPL-a goal 20 thun tling rang ber record lo siam tawhtu Haaland hian khelh 39 atangin EPL-ah goal 41 a thun tawh a, assist vawi kua a nei tawh bawk a, EPL-ah goal 50 thawkchhuak rang ber record thar a siam. EPL-ah goal 50 a inrawlh tling rang ber record lo awm tawh khelh 43 atanga goal 50-a inrawlh Andrew Cole record chu Haaland hian a thaichhe ta a ni.
Fulham laka hattrick a siam bakah EPL record thar a siam leh tak vangin Haaland-a’n chawlhkar ropui bik a hmang. Haaland hian PFA player of the year leh UEFA Best player chawimawina a dawng hlimhlawt a. Khawvela league ropui ber EPL-ah record duhawm tak a siam zui leh zat bawk a, Haaland ropui zia a lang nawn awn awn. Season liam ta anga club leh ram tan a chetha zui leh thei a nih ngat chuan Haaland hian Ballon d’Or a dawn thuai a beiseiawm. Ronaldo leh Messi thlaktu ni thei tura ngaih a ni bawk.
Champion lai City hi season tharah pawh an chetha zui leh nghal chat a, EPL season thara an khelh hmasak pali-ah hnehna an chang zawn. EPL club 20 zingah season thara vawi li chak zawn thei awmchhun an ni nghe nghe.