I chhas ‘ex’ kha i thik em?

I chhas ‘ex’ kha i thik em?
A ‘ex’ kha i thik tlat a, i be tha thei hlawl lo. Mahse, kha thikthu kha awmze nei lo leh tul lo a intihhahna leh buai thlawnna mai a ni. Thik loh theih i duh em?
A hmasa berah chuan tuna i kawppui lakah khan rinna nei rawh. Inrintawnna hi inlaichinnaah chuan a kila lung pawimawh ber niin an sawi thin. I kawppui chu i laka a rinawmna i rinhlelh fo chuan a tan a nuam lo hle dawn a, a thinrim phah fo ang. A ngaihzawng hlui chungchang i zawh fo phei chuan in pahniha inkar tichhetu a la ni thei dawn a nia. I rilru a la nuam thei zân lo a nih pawhin, amahah rinna nei angin lan tum rawh le. A kalna ni a sawiah khan a kal tak tak em tih te i check leh kher thin a nih chuan chutiang chu bansan rawh. ‘Ka hmangaih che’ a tih chuan ring phawt mai rawh.
Midang nen intehkhin ching suh. A chang chuan kan thikthu avanga mahni indah/inhmuh hniamna te kan neih phah thin. “Engtin nge kei ve mai hi min hmangaih theih?” tih te kan inzawt a, ‘Engtin nge ani angin keini ang te min duh ve theih?” tih te. Miin min hmangaihna chhan dik tak hi tuman kan hrethiam tak tak dawn lo. keini aia hmeltha, hausa zawk, fing zawk, nalh zawk hi kan chheh velah an kuh tul, mahse, chung chu intihbuai tir suh. Nangmah kha a hmangaih che chuan midangin an neih ve loh nangmahah khan a hmuh vang a ni a, chu chu ani pawhin a sawifiah mai theih loh tur a ni ve tho. Chuvangin midang thik kual reng bik suh, nangmah ngei kha a hmangaih che a, a ‘ex’ nen intehkhinin i rilru ti hah duh suh.
Inthen a tul a nih pawhin chumi atan chuan inpeih rawh. Mithenkhat, mahni indah sang, engkim maia a boruak vaivirtu nih tum te hi an thikthu a chhe duh hle. Heng mite hi chuan midang chu ‘bungrua’ ang lekah an ngai a, an bungrua chu midang tawmpui an phal lo a, an kawppui te lakah pawh an thikthu a chhiain, midang an lo nuih ve satliah ringawt te pawhin an thin a tirim a, midang an kawm ve pawh an ngaithei lo. Mahse, mihring chu bungrua emaw milem emaw ang lek kan ni lo va, ven tlat chi kan ni lo. Mi kan hmangaih pawhin anmahni kaltir a ngai a nih chuan kaltir thei tura kan inbuatsaih lawk a ngai. Thinrimna, hlauhna leh thikthu hian hmangaihna a tireh vek thei a nia.
Mithenkhat chuan an kawppui te thik tura eng emaw han tih zeuh hi nuam an ti ve tlat. Hetiang hi tih loh tawp tur a ni. I kawppui/ngaihzawng hriat tura midang lo flirt vel kha chu a tiha tih loh tawp tur, ‘A van hmeltha’ tih te, ‘A bula awm a nuam’ tih te, ‘A nalh thei e,’ tih ang chi leh thildang a thik theih tur chu i hriat kha. Inthik tir tuma hetiang game khelh hi chu tih loh tawp tur a ni, a tawpah a tuartu zawkah kan tang duh khawp mai.
Rinthu leh a tak tak thliar thiam tur a ni. Thikthu chhiat lutuk chuan kan ngaihtuahna leh rinthu te hi a tak tak emaw kan ti tawh mai thin. Suangtuahna te hi kan hlawkna atana kan hman theih chuan a tha hle a, mahse, rilru tihrehawmtu a kan hman chuan thil pawi tak a ni thung. Chuvangin i suangtuahna te kha a tak tak emaw tiin nangmah intih hrehawm phah nan hmang suh.
I kawppui chu i rin aiin a rawn haw tlai a, tah chuan thil i ngaihtuah kual ta vak vak a. Tunen emaw inhmu a, engtin emaw awm kual vel tur ang ten i ngaihtuah a. Chu chuan i thin a tirim a, i lungawi lo a, i hlauthawng a, mahse engmah chutiang thil chu a thleng tih entirna i nei chuang miah si lo. A lo haw, i lo thinrim a, i rilru sawi tlang dawt duh si lovin engtin emaw tak i lo tikual vel a, tichuan in inhau a, a tawpah chuan boruak chhe zawk a lo thleng ta mai thin.
Thikthu chhiat hi thil hrehawm tak a ni a, suangtuahnain mi a tibuai tawh phei chuan awm ngaihna a awm tawh thin lo. Chutiang hunah chuan engtin nge i tih ang. He exercise hi han ti ve chhin teh le. Maimit chhing la, hahdam takin awm rawh. Tichuan engin nge i thikthu chawk chhuak ber thin tih ngaihtuah teh. I kawppui midang bula a awm in nge, midang bula hlim hmel taka a nui lai i hmuhin? Thildang pawh a la tam ang. Tichuan thawk han la vang vang la, i taksa peng hrang hrang chu awm hahdam tir rawh, tichuan i awmdan chu han mitthla la, hahdam taka i awm lai chu. Chumi hnuah chuan i thikthu tichhe ber tur anga awm angin i kawppui chu suangtuah la, mahse, nang chu thikthu chhe lo leh engtin mah awm lo angin i mitthlaah chuan inhmu tlat rawh. Chutianga i tih nasat theih phawt chuan thikthu avanga buaina i neih tlem phah ngei ang.