Employment agency-te chhui chian tul

India ram pawna domestic hna hrang hrang thawka eizawnna ngaihtuahsaktu agency hi Mizoramah 40 chuang a awm nia sawi a ni a. Heng agency thenkhat kaltlanga ram pawna hnathawka thawn chhuah, harsatna tawk leh si hi tun lai hian an awm ta zut mai a. Hei hi sawrkar hian chhui chiangin, mipui hnenah thil awmzia dik tak puangzar thei se a duhawm ta hle.
He harsatna chungchanga thil awmzia thlithlaia zirchiangtu pakhat chuan, Mizorama employment agency-te hian India ram pawna hnathawk tur thawnchhuah theihna license an nei lo niin a sawi a. Hei hi thil serious deuh mai a ni a, sawrkarin a chhui chian a pawimawh hle. Sawrkar phalna leh remtihna pawh nei lova ram pawna mihring thawn chhuah hi dan kalh a ni nghal a, license nei lo na na nain license neite chauh tihtur an lo ti a nih chuan, human trafficking lam a pawl tihna a ni a, thenkhat harsatna atang hi chuan human trafficking type (domestic servitude) a thleng niin a lang. Chumi thlentirtu chu dan kalha agency din hmanga mihring thawn chhuahna a nih miau dawn avangin dan anga an chunga action lak theihna a ni awm e.
He harsatna thleng mek atang hian sawrkar pawh hian thalai hna thawh tur zawnsak kawngah ngaihtuahna thar seng thei se a duhawm ta hle. Kum tin thalai lehkhathiam hna hmu lo hi an lo chhuak zel dawn a, hei hi department pakhat tawpin an enkawl a ngai tawh a, human resources development lamah hian bung thar kaina tur ngaihtuah a nih loh chuan, thalaite hnathawh tur nei lo inhnawh tawt hian a chhe lamah nghawng na tak a nei mai ang tih hlauhawm tak a ni.
Tuna harsatna thleng mek ang pawh hi, tun hnua a thlen tawh loh nan leh, fel fai zawka thalai tam zawkin ram pawna eizawnna rintlak an neih theih nan sawrkar hian example tha tak siam mawlh teh se.