Kawlthei

Kawlthei
Kawlthei hi thei dang te nena khaikhin chuan a man a tlawm a, chutihrualin taksa hrisel nana chaw tha tinreng pai a nih avangin ‘superfood’ ti te pawhin an sawi thin. Tun tumah hian Times of India health section-a kawlthei thatna hrang hrang an ziah te kan rawn tarlang ang.
1. Kawlthei chu a hmin atanga ni hnih chhunga ei a tha ber.
2. Kawlthei pumkhatah hian balhla pumkhata potassium awm zat ang vel tho a awm ve a, chuvangin blood pressure (BP) siam thatu pawimawh tak a ni a, lung (heart) tan chaw tha tak a ni bawk. Potassium chuan sodium hnathawh a do let a, chuvangin BP siam nan a tha hle a, thisena cholesterol level a tihniam bawk.
3. Fibre a pai hnem a, diabetic tan a tha hle. Fibre pai tam chi chaw ei tam hian Type 2 diabetes risk a tihniam thei a, chaw paitawh lama harsatna neite tan pawh a tha.
4. Kawlthei hian serthlum aiin a let liin Vitamin C a paihnem zawk. Vitamin C chuan antioxidant propertties a nei a, chu chuan free radicals vanga kan cell chhe tur vengin, cancer risk pawh a tihniam thei.
5. Kawlthei hian iodine a pai lo nain thyroid tan a tha tho, copper a pai a, chu chuan hormone production leh absorption a pui thei.
6. Vitamin B a pai a, Niacin (Vitamin B3) a paihnem lehzual a, chu chuan thisen luangvel a tichak a, thluak hnathawh a tichak thei. Vitamin B6 (pyridoxine) a pai bawk a, chu chuan thluak leh nerve hnathawk a tichak thei bawk. Chuvangin, kawlthei chu thluak tan chaw tha tak a ni.
7. Folate a pai hnem hle a, chu chu hmeichhia, naupai lama harsatna nei te tan a tha hle.
8. Vitamin A pawh a pai hnem a, mit tan chawtha tak a ni.
9. Vitamin E pawh a pai hnem a, chu chu vun tan a tha hle.
10. Kawlthei rawng senno deuh chi hian lycopene a pai hnem hle a, lycopene paihnem a sawi tomato let hnihin lycopene a paihnem zawk. Lycopene chu ni zung hlauhawm (UV ray) laka vun vengtu pawimawh tak a ni a, cancer chi hrang hrang risk tihniamtu a ni bawk.
11. Kawlthei hnah tui sawr pawh hritlang leh khuh tan damdawi tha tak a ni.