India ram a ruala inthlanin sawi hlawh zel

Union government chuan Ram Nath Kovind kaihhruai committee dinin Lok Sabha, legislative Assembly, Municipal leh Panchayats te a ruala inthlanna neih theih a nih leh nih loh an zirchiang dawn a. A ruala inthlanna neih hi tun hnai kum nga chhung vel sawi tawh niin Bharatiya Janata Party tena manifesto hiala an telh a ni bawk.
Lok Sabha inthlan leh chu June 16, 2024 hmaa neih ngei tur a ni a. A ruala inthlanna kalpui tur tih a nih chuan State pali – Andhra Pradesh, Arunachal Pradesh, Odisha leh Sikkim te tih chauh loh chu state dang sorkarte chu tihtawp vek a ngai dawn a. Heng state pali te hi chu Lok Sabha inthlan ruala inthlan nghal zel an nih thung vang a ni. Chutiang bawk chuan kum 2029 ah a ruala inthlan kalpui ni se chuan heng state pali te hi tihbuaiin an awm veleh thung ang.
A ruala inthlan neih a nih chuan State 17 te Assembly term chu kum khat leh a chanve dawna pawhtawiin a awm dawn a. Karnataka, Meghalaya, Nagaland, Tripura, Himachal Pradesh leh Gujarat te phei chu kum thum leh a chanve vel lawiha pawhtawiin a awm thung dawn a ni.
Sorkar chuan \an chhana a neih ber chu inthlan hautak lutuk tihziaawmna tur tih a ni a. Law Commission chuan kum 2018 a report a buatsaihah Lok Sabha leh State Assembly a sum sen te chu a inang deuh reng a ti a. Hei vang hian heng inthlante a ruala neih chuan sum sen a zahve velin a tihniam ang a ti a.
Chutihrual chuan India rama legislative leh governance hrang hrangah a ruala inthlanna neih chuan nghawng a neih dan tur pawh sawilan a ni a. India hian Lok Sabha MP 543 a nei a, Assembly legislator 4,100 chuang, urban wards aiawh 89,194 vel leh panchayats aiawh 31.89 lakhs vel a nei a ni. Heng mite hian mawhphurhna hranpa \heuh an nei a, an tam tham dan en chuan an hmalakna leh tihtur \heuha an pawimawhna a langfiah thung.
Entirnan, miin an venga bawlhhlawh paihdana ngaihmawh leh chinfel a duh a nih chuan an local ward a chingfel thei ber tura a ngaih chu a vote mai dawn a ni. Chutihlaiin MP leh MLA te chu constituency lian zawk aiawh niin Union government leh State kaihhnawih dan pawimawh siamtu an ni thung.
Chumai bakah Assembly te tawp hmaa tihtawpa inthlan a ruala neih chuan federalism leh three-tier governance a tibuai thei bawk a ni.