Iran-in strait paltlang tur lawng 26 kalna tur ruahman

Iran-a Islamic Revolutionary Guard Corps (IRGC) chuan darkar 24 kalta chhungin Strait of Hormuz kaltlang tur lawng 26 kalna tur an ruahman fel tih an sawi a, hetih lai hian Washington leh Tehran inkara tuikawng kal theihna atana inbiakna chu chawlhsan a la ni.
Iran-a sorkar hnuaia mi, ISNA news agency-in Nilainia thuchhuah a dawn a tihchhuahah, “Strait of Hormuz kaltlanga lawng kal hi phalna nei tan a ni a, IRGC Navy nena inremna siam a ni,” a ti.
February 28-a Iran laka US leh Israel tang dunin indona an kalpui hma kha chuan strait-ah hian khawvel puma energy phurh hmun ngaa thena hmun khat vel a kaltlang thin a, beih an nih avang hian Tehran chuan a khar a ni.
US President Donald Trump-a kaihhruai sorkar chuan Iranian lawng chawlhhmunte chu khar zuiin Iran sim lak luhna pui ber, tuialhthei an thawn chhuah chu a tawp phah.
Inhmuh thiam lohna hian khawvel energy sumdawnnaah harsatna nasa tak a siam bakah mihringte tana chhiatna thleng tur chungchangah pawh ngaihtuahna a siam bawk.
Nilaini khan Food & Agriculture Organization of the United Nations (FAO) chuan tuikawng khar hian thla ruk atanga thla 12 chhungin khawvel puma ei leh in manah harsatna nasa tak a thlen thei tih a sawi a, ‘awmze nei taka thlai thar chhuah khawl harsatna bul tanna’ tiin a sawi.
Rome-a hmunpui nei agency chuan buaina hi bungraw inthawn leh energy sumdawnna mai a nih tawh loh thu sawiin, khawvel pum huapa lo atanga thar chhuah kaltlangin chhawng hrang hrangin nghawng tha lo a nei tih a sawi.
“A nghawng hrang hrang a inher chhuak zel a: energy, lei tha, thlai chi, thar chhuah tlem, ni tin mamawh man sang, chutah ei tur man to thlengin a ni,” tiin FAO chuan a sawi.
Nilaini khan Trump-a chuan Iran nena inbiaknaah ‘hmasawnna’ a awm thu a sawi a. Hetih rual hian Tehran hian inremna siam a remti lo a nih chuan sipai chakna hmanga beih chhunzawmah a vau bawk.
Iranian Foreign Minister Abbas Araghchi-a chuan ‘indonaa kir leh chuan mak tih tur tam tak a awm dawn’ tiin a vau let a. IRGC chuan Iran hi beih leh a nih chuan an chhehvel piah lamah tihzauha buaina zau zawk a awm dawn tih a sawi bawk.