Wang Yi an Russia tlawh zui nghal zat

Chinese top diplomat Wang Yi chuan Russia tlawhin ram pahnih ten security chungchang an sawi dun dawn a, Moscow chuan Ukraine a runna kal zelah lamtang a la zawng zui zel a ni.
Moscow hi Beijing thian tha niin indonaah pawh langtlang si lova inpui tawn reng niin mahse a lang a pau chuan an pha tlat thung.
Wang hian Moscow a tlawhna chhan hi Vladimir Putin an Beijing a tlawh vat theih nana hmalakna tia sawi a ni bawk.
A hmain Putin chuan Chinese President Xi Jinping nen chuan an inhmuh vat tur thu a sawi a, mahse engtik hun nge tih erawh a sawi lang lo thung.
Ukraine indona avanga International Criminal Court in Putin manna a tihchhuah hnuah Russia ram a la chhuahsan leh lo a ni.
A hma lawkin Putin chu North Korea hotu lu ber Kim Jong Un-a’n Russia-ah a kalchilh tawh bawk a. China foreign ministry chuan Wang chuan ‘strategic consultations’ nei turin ni li lai a cham ang an ti bawk.
Moscow chuan Wang leh Russian foreign minister Sergei Lavrov te chuan titidunna neiin Ukraine chungchang leh Asia-Pacific security an sawi dun ang tiin a tarlang.
Putin hian a hma lawkin North Korean leader Kim chu mikhualin hei hi US chuan na taka sawiselin Russia chuan North Korea ralthuam lei a tum tiin a sawi a. Moscow chu Ukraine indona a kalpuiah ralthuam lam a tlachham mek tia sawi a ni.
Russia leh North Korea thung chuan ‘military cooperation’ leh Pyongyang satellite programme lam an sawi dun tiin an sawi ve thung.
Kim an Moscow a tlawh hi China foreign ministry chuan a sawisel duh miah lo bawk a, ‘ram pahnih inkar thil a ni’ ti chauhin a sawi bawk.
Mahse analyst te chuan North-Korea-Russia inbiakna leh inkawmngeihna chu China hriatpuinaa thleng tiin an sawi thung a, heng ram pahnihte hi Beijing in inlaichinna a neihpui that pahnih te an ni an ti thung.
Heng ram pathum te inlaichinna hi socialist ideology piah lamah US leh khawthlang ram an rinloh tawnna avang a ni bawk a. Beijing chu hun rei tak Pyongyang economic lifeline ni tawh niin a sumdawnpui lian ber a ni bawk a, tun hnaiah Moscow oil leh gas a lei nasa bawk.
“Russia leh North Korea inkara thil thleng hi China hriatpuina tello chuan a thleng thei lo. Beijing remtihna tel lovin engmah a thleng lovang” tiin Alexander Korolev, China-Russia relations lama mithiam University of New South Wales, Australia chuan a sawi.
Wang an Russia a tlawh hma lawk hian Malta-ah Wang leh US national security adviser Jake Sullivan te chu an inhmu bawk a. US-China inzawmna mai piah lamah regional security leh Ukraine war te an sawi dun tiin US leh China thuchhuah chuan a tarlang ve ve bawk.
US chuan China chu North Korea nawr turin a ngiat an tih laiin China chuan a hnial fithla an ti bawk a. “China hian US duhdan zahsak se chuan kum khat chuang chetlakna hun a nei tawh a, a duh lo a ni mai” tiin Korolev chuan a sawi.
US chuan China chu economic thil leh technology lama Russia puiru char charah a puh a. US intelligence te chuan July thla daih tawh khan Beijing chuan Ukraine indona kal mek zelah Russia chu Khawthlang ram tena an hrekna laka tanpuina a pe char char an ti.