US-in Cuban hruaitu hlui, Castro-a thubuai siamsak

US chuan Cuban hruaitu hlui, Raúl Castro chu kum 1996-a Cuba leh Florida inkara thlawhtheihna pahnih a tlaa US mi leh sa thahna inrawlh leh thil sual dang tiah a puh.
Nilainia thubuai puanah hian Castro leh mi dang panga chu Cuban-American group Brothers to the Rescue thlawhtheihna kap thlaah puh an ni a, mi pali thi zinga pathum chu American an ni.
Castro-a hi tuna kum 94 mi a ni tawh a, hetih lai chuan an ram sipai hotu a ni a, thlawhna tla chungchangah hian ram dangte sawiselna pawh a tawk nasa hle.
US chuan Cuba-a communist rorelna chu nasa zawka nawr a tum mek laiin President Miguel Díaz-Canel-a chuan thubuai siamsak hi ‘politic- thiltih, dan hmaa tanchhan nei lo’ tiin a sawi.
Miami-a Freedom Tower-a thu a sawinaah Acting Attorney General Todd Blanche-a chuan US-in Castro-a chu thlawhna tihchhiat thubuai siamsak a tum thu a puang a. Armando Alejandre Jr, Carlos Alberto Costa, Mario Manuel de la Peña leh Pablo Morales te thihna chungchangah mi pali thah thubuai siamsak a tum bawk.
Blanche-a chuan, “US leh President Trump-a hian a mite hi an theihnghilh lo va, an theihnghilh dawn lo bawk,” a ti.
Thubuai hi US court-ah sawi tur a ni a, thenkhat hi dam chhung tan theihna a ni a. Tualthah thubuai pakhat theuh hian tihhlum emaw, dam chhung lung ina tantir hremna pek theih vek a ni.
Thuthar thehdarhtuten Castro-a hi thubuai siamsak tura US-a hruai luh dan tur an zawt a, Blanche-a chuan man theihna thupek a awm thuin a chhang.
US hian Castro hi man a tum dawn em tih erawh a sawi chiang lo va, “A rawn lan ngei kan beisei a, a duhthuin emaw, kawng dangin emaw a rawn lang dawn a ni,” a ti thung.
January khan US hian Venezuela president hlui, Nicolás Maduro a man a, US-a hruai tumin sipai beihpui a thlak a, hei hi justice department-in dan bawhchhiaa puh hnuah a ni.
Venezuela leh Washington inkar boruak a tidanglam nasa hle a, hetiang hi Cuba-ah pawh thleng thei niin mi thiamte chuan an ngai.
Kum 95 dawn ni tawh a, Cuban ram hruaitu thi tawh, Fidel Castro-a unaupa, Castro hi mi pawimawh tak a la ni reng a, ‘Cuban Revolution hruaitu’ la dam anga pawm a ni.
Sorkar leh party lama a hna a chawlhsan tawh a; mahse, kum 2008-2018-a president a nih chhung khan US president hlui, Barack Obama nen Washington-Havana inlaichinna chu hun rei lote chhung an kaihruai a ni.