Mim Kut hmang dawn

Mizote Kut hriat hlawh pathum zing ami, pialrala kal ta te puala hman thin Mim Kut chu thang lo thar zelah a thih mai loh nan Mizoram sawrkar chuan hman thar a rel a, sawrkar huaihawta hman tum khatna hi September 29 hian Vanapa Hall-ah hman a ni dawn.
Social Welfare & Tribal Affairs minister Er Lalrinawma chuan Mim Kut hmanna tur hi sawrkar laipui Ministry of Tribal Affairs-ah project report siamin sum a dil a, a ruahman ang leh sum a dil ang chu pe chiah loin, nuai 20 a rawn pe tih a sawi a. Hemi hmang hian, state sawrkar sum seng loin hman phawt a ni dawn tih a sawi.
He Kut hi kan hmangaih mual liamta te hriatrengna hun a nih avangin, chhungtinte chu an hmangaih kalta te thlan cheitha a, enkawltu nei lo thlanram tawhte pawh cheithat sakin, September 29 tlai hian an hmangaih kalta te pualin chhungkhat leh thianthate nen chawhlui kilho turin a chah tih a sawi a ni.
Zemabawk rama Riangvaite Thlanmual chu Central YMA leh YMA branch thenkhat ten a bul umin, Kut denchhen hian cheithat a ni dawn a. Mizoram Merchant Association (MIMA) chu Kut puala an thil zawrh tihtlawm (discount) runpui nei tura ngen an ni tih a sawi bawk.
Minister chuan Mim Kut chu hun rei tak Mizoten kan hman tawh loh hnuah Kut dangte ang bawkin tharthawh leh a ni tih sawiin, mumal leh program liantham zawka hman chhoh zel a beisei tih a sawi. Kut ni hian sawrkar hnathawk zawng zawngte chu Mizo thuama inthuam theuh tur leh midang tana thil tha tih hun atana hmang turin mipui a ngen tih a sawi a ni.
Sawrkarin thuchhuah a siam danin, Vaimim seng zawh (September) a hman Mim Kut hi mitthi ngaia tahna Kut a ni a. Mahse piputen damlai khawvel leh fam chang tawh khawvel inzawmna an lo hriat zia a tilang. Kristianna a lo luh atangin Mizote nunphung leh chin than thil tam tak thiahsak kan ni a, chu chuan kan hnam hmel leh nunphung a tidanglam nasa a; Kristianna leh heng thil hluite hi inmil theiin an hre loa, pipute thil chin than tam tak chu zawi zawiin a lo chuaiin thangtharte rilruah hmun a chang lo tial tial a ni. Mizote zingah mahni hnam thila harh tharna a thleng zel a, hnam nunphung leh zia mualliam tawha ngaihte chawilar thar niin, heng zingah hian kan Kut neih pathuma pilbo tawha ngaih ‘Mim Kut’ chu Kristianna mil leh inhnerem zawngin kumtin hman tum a ni tih a sawi a ni.