Online-in ram chhiah pek theih tawh

Mizorama a bul tanna atan online (internet) kaltlanga chhiah pekna “online tax & Zoram chhiah payment” chu Thawhlehni khan Land Revenue & Settlement minister Lalruatkima chuan a tlangzarh a. Survey of Villages Abadi and Mapping with Improvised Technology in Village Areas (SVAMITVA) scheme hnuaiah property card a sem bawk.
Chhiah pek chu khua leh tuiten kan tih tur, kan mawhphurhna a ni tih kan hriat a pawimawh a, a hun taka chhiah pek hi kan tum a pawimawh a, kan inzirtir a tul hle, tiin Revenue minister hian a sawi a. Online payment system thar hmang hian mipuiin mahni inchhunglum atangin awlsam takin chhiah kan pe thei tawh dawn tih a sawi.
National Generic Document Registration System kalpui mekah Sub- Registrars’ Office (SRO) chu district thar – Khawzawl, Hnahthial leh Saitual tih loh district dang zawngah hawn a ni tawh tih sawiin, “Document hrang hrang kan neih te, thurochhiah thlengin SRO hnena inziahluh a pawimawh a, court-ah thubuai hlabuai a awm pawhin heng document, SRO hnena register tawhte hi chu sawrkar document a nih tawh avangin thiam chan a awlsam zawk tawh a, kan register loh chuan harsatna kan tawk thui thei zawk a ni,” Lalruatkima hian a ti.
Property card chu LSC nen a danglam loh thu sawiin, dan anga ram neitu nihna mipui hnenah a pek thu te, property card hmangin mipuiin awlsam zawka loan an lak theih tur thu leh zangnadawmna lak kawngah pawh VC pass-in a huam ve loh ram hlutna (land value) chhut tel a nih tawh tur thu te a sawi a ni.

ONLINE TAX:

# Online revenue payment system hnuaiah hian land tax leh Zoram chhiah pekna module hran ve ve a awm a; online portal – landtax.mizoram.gov.in kaltlangin chhiah a pek theih tawh dawn a ni.
# A bul tan nan Aizawl Municipal Corporation huamchhunga hman phawt a ni anga, a hlawhtlin dan azirin huang zauha Mizoram pum tuam chhuah tum a ni.
# CSC hrang hrang kaltlangin chhiah hi a pek theih dawn a, a sumfaia pe duh tan Revenue office ah kalin a pek theih bawk..
# Online payment bank partner atan HDFC Bank hman a ni a. LR&S leh HDFC hian November 2021 ah inremna thluthlung an ziak.

SVAMITVA:

# SVAMITVA scheme hi sawrkar laipui Ministry of Panchayati Raj hnuaia central sector scheme a ni a. He scheme hnuaiah hian drone hmangin thingtlang khuaa mihring chenna hmunte thla lak a ni a, thlalak hmang hian property card siamsak theuh an ni.
# Property card kaltlang hian mipui chu dan anga ram neitu nihna pek an ni a, hei hian ramri chungchanga buaina a tihtlem bakah khaw hmunhma ruahman (town & village planning) leh loan lak kawngah awlsamna a thlen beisei a ni.
# Ministry of Panchayat, state Land Revenue & Settlement Department leh Survey of India thawhhonaa kalpui a ni.
# Mizoram khua 319-ah he scheme hi kalpui tura ruahman a ni a, khua 171-ah drone hmanga thla lak tan a ni tawh. # Hmarchhak state zingah Phulpui leh Tachhip chu property card semchhuahna hmasa ber niin, 2023 April 24 khan property card 420, Phulpuiah card 166 leh Tachhipah card 254 sem a ni.
# September 19 khan khaw 7 – Thiak (161), Sumsuih (158), Hmuifang (63), Lamchhip (113), Chamring (56), Sailam (164) leh Lungsei (48) ah property card 763 sem a ni a. Heng khaw VC-te hnenah an area-a ram neitute hming leh an ram neih chin tarlanna map hlan a ni bawk.