MLA-te car thar lei nghal ang kha kan ti ve dawn lo – K Sapdanga

ZPM sawrkar chuan MLA-ten car thar leina tura sum tam tak senga sawrkar thar a nih veleh an lei nghal ngawt ang kha an ti ve dawn lo tih ZPM working president K Sapdanga chuan a sawi.
Serlui bial huamchhung khua a fannaah ZPM working president chuan sawrkar hlima MLA-te tana car thar leina siam nghal ang chi kha an ti dawn loa, inremchem chungin ram tan hna an thawk dawn a, tute emaw sum siamna atana sawrkar sum ren lo taka hman ang chi an ti ve ngai dawn lo tih a sawi.
Sawrkar kalphung hlui chu vuiliam an chak ngawih ngawih tawh a, dik lo leh fel lo huaisen taka hnawl ngam turin tanrual a tul tih K Sapdanga hian a sawi. Bial hrang hrangah an bialtu MLA an thlang dawn a ni satliah loa, sawrkar thar an tuak dawn a, vote kan thlak hian chief minister tur kan vote tel tih hria a, kan thlawhhma kawng leh kan khaw kar kawng te kan vote tel tih hre turin a chah. “Inthlan awm turah hian leiba min siam belh thur thur tur nge kan vote zel dawn a, inrenchem taka ram kaihhruai tumte kan vote dawn tih ngaihtuah ila, kalphung thar mipui sawrkar tuakchhuah puiah ka sawm che u a ni,” a ti.
ZPM a sawrkar chuan Budget Session hmasa berah kuthnathawktute pual budget an dah anga, he budget hmang hian thlai thar thlan bik pali an lei dawn tih a sawi bawk.