Lawngtlaiah CR Ratio 112.76%

Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit-Deposit Ratio ah Lawngtlai district bank-te chuan sawrkar kum kal mek quarter hmasa ber (April -June) ah national benchmark 60% khumin 112.76 an nei.
District Consultative Committee Lawngtlai thutkhawma report danin, tun quarter-a Lawngtlai district CD Ratio hi Mizoram district hrang hrang zingah a tha ber pawl a ni. An district-ah hian bank branch 12 an awm mek a, ATM 5 awmin bank awm lohna khuaa bank nen a indawrtawnna kawnga mipui puitu tur – business correspondent 84 an awm a, Financial Literacy Centre pakhat a awm bawk.
Loan dil dan leh thil tul hrang hrang inzirtirna leh sawrkar hnuaia bank kaltlanga hamthatna awm inhrilhhriatna, Financial Literacy Campaign tum 29 kalpui a ni.
Mipuiin harsatna an tawh loh nan Rs. 2000 note tih thih a nih dawn avangin September 30 thleng bank-ah dahluh theih a nih thu sawi a ni a. Bank hrang hranga venhimna kalpui dan te sawi a ni bawk.
Committee chairman, district bawrhsap H Lalhmingthanga chuan bank-a thawktute leh mipui indawrtawnna kawnga harsatna awm thinah, anmahni dawrtu mipuiin an harsatna an hriatthiam theih nan chiang taka hrilhfiah thin a pawimawh tih a sawi a. Hemi kawngah hian thuthar thehdarhtute leh social media hmang tangkai thiam turin a chah.