School pahnihin jubilee lawm

Govt. Primary School Thingsat chuan Thawhlehni khan an kum 60 tlin, Diamond Jubilee an lawm.
He hun hmanpuitu School Education minister Lalchhandama Ralte chuan kum 60 chhungin Govt Primary School Thingsat hian fa duhawm tak tak a lo hring tawh tih hmuhin a hlimawm hle tih a sawi a. Zirlaite chu taima leh tumruha an zir chuan Thingsat atangin mi hlawhtling an ni thei tih he hmun atanga zir chhuak hlawhtlingten an lantir tih a sawi.
“Zirtirtute chu zirna in neitu thinlung pu an nih a ngai a, hun vawng dik leh sikula awm tha an nih a pawimawh avangin, tunhnaia zirtirtu lakah a theih chin chinah a khaw mi lak tum zel an ni,” a ti a. Zirna in leh compound chu khawtlang rohlu a ni tih hria a, humhalh tha turin khawtlang hruaitute leh nu leh pate a chah.
Govt. Thingsat Primary School hi kum 1963 a din a ni a. Thingsat UPS-ah hian kuminah zirtirtu 9 leh zirlai 40 an awm a ni.
Thawhlehni vek khan Govt Middle School Sakawrdai chuan an kum 50 tlin, Golden Jubilee an lawm a. School Education minister Lalchhandama Ralte tho hian a hmanpui.
Zirna ngaisang apiang khaw hmasawn an ni tih minister hian sawiin, “Zirna hian khawtlang nunah a lailum a luah a ngai a. He jubilee hian zirna hi mihring inchherna hmunpui a ni a, naupang seilian hian rahbi dik an rah a ngai tih min hrilhhretu ah tang se ka duh,” a ti. Govt Middle School Sakawrdai hi kum 1973 a din a ni a, Golden Jubilee lawmnaah hian Sinlung Hills Council hotute, Sakawrdai khawtlang hruaitute, tlawmngai pawl hruaitute, he sikula lo thawk tawh leh zir chhuakte, tuna zirlai leh zirtirtute an tel a ni.