Huaisen chawimawina hlan

Saitual district Mualpheng khua ami Imanuel Lalawmpuia (L) s/o Ronald Lalchhuanawma chuan India rama civil mite tana huaisen chawimawina sang ber – Sarvottam Jeevan Raksha Padak Award a dawng a, Thawhlehni khan a chhungte hnenah hlan a ni.
Award dawngtu Imanuel Lalawmpuia (L) hi Ronald Lalchhuanawma leh Lalfakawmi te fapa niin, nunna a chan lai hian BA 6th Semester a zir mek. 2022 April 2 khan a thiante nen Aizawl Sahuan enin an kal a, an hawlam Tlawng Sihhmui kaia inchiahdai tura an kal chu, an thianpa pakhat tuiah tla in a talbuai a, chhan tumin Imanuel Lalawmpuia hian a thianpa awmna lam panin a lut nghal a, theihtawpa a beih hnu ah a thianpa hi vaukam lamah a inhai chhuak thei a, a ni erawh a thianpa a chhanna lamah tui khauh chuan a la zui ta a ni.
Award hlanchhawngtu Saitual district bawrhsap Dr Lalngura Tlau chuan, an hun hman chu mi ropui chawimawina hun a ni, tiin, an district ami, India rama civil mi, mi huaisente tana chawimawina sang ber dawng thei an awm chu ropui a tih thu a sawi.
Award dawngtu Imanuel Lalawmpuia (L) pa Ronald Lalchhuanawma chuan an fapa chu tlangval nungchang zawi, nu leh pa thuawih thei tak a ni, tiin, an channa chu an chhungkaw tan tawrhna nasa tak ni mah se, an fapa in midang nunna chhanna atana a nunna a hlan chu an chhuang takzet tih a sawi a ni.
Sarvottam Jeevan Raksha Padak Award hi India ramin mi huaisen te, hun leh hmun harsa tak kara mahni nunna hial thapa midang nunna chhanchhuaktute hnen a a hlan thin a ni a. Award hian medal, citation leh sumfai cheng nuai hnih a keng a ni.