Si phur hmasa chunga chak nuamsa Liverpool

Si phur hmasa chunga chak nuamsa Liverpool
Ningani zanah An-field club-in Austria ramah Europa League group stage bul an tan a, half time thlenga an goal khat phurh an sut zawh loh hnu second half-ah harhtharna changin mualneitu team LASK Linz lakah 3-1 hnehna an changlet a, point thum rut chungin Group E hna hmasa an hlenchhuak phawt.
2022-23 Austrian Bundesliga lama pathum-na luahtu LASK tan minute 14-na lekah winger Florian Flecker chuan rinloh takin hmahruaina goal a thun nawlh a, corner atanga ball chhuak a hlapluh hi Liverpool keeper Caoimhin Kelleher tan dan ngaihna a awm lo.
English team hian first half tawp dawnah an siphurh sutna hun rem-chang mangkheng hmu bawk mah se hnai set sawt atanga Darwin Nunez-a tauh chu goalkeeper Tobias Lawal chuan a save thei tlat.
Box chhunga winger Luis Diaz an tihtluk avangin second half tir lamah Juergen Klopp-a team-in penalty an hlawhchhuak a, Nunez chuan damdapa chhuihlutin mikhual siphurh a sut zui ta tho a ni.
Minute 63-ah Ryan Gravenberch-a ball chhawp tha zet chhawrin penalty hlawhchhuaktu Diaz chuan Reds hmahruailetna goal a thawh ve leh a; hun tawp hma minute hnih la awma second half substitute Mohamed Salah-a goal nen chiang zawkin Austria leilungah Premier League club-in point thum an thawkchhuak.
Europe game an khelh hma chiaha Wolves game khel player 11 ngawt thlakin Austria ramah Klopp chuan Liverpool team dang daih a chhawr a, thlaveng atan bench lamah Dominik Szoboszlai, Alexis Mac Allister leh Salah a thuttir!
Team khawng ber hmanga bul an tan loh chuan 2016 final-a Sevilla an hneh loh hnua Europa League match an khelh leh vawikhatnaah nghawng a nei tih a hmuh theih a, first half-ah Reds game a fuh lo a, mahse, second half-ah tholehin hnehna an chang zui ta tho a ni.
Liverpool regular first team dik takin bul tan chiah lo mah se Liverpool XI-ah khan captain banhren nen Virgil Van Dijk hmuh tur a awm a, kumin nipui laia Bayern Munich atanga pound maktaduai 34.3-a an lakluh Gravenberch pawhin Reds tana a full debut a nghakchhuak ve bawk a, Austrian club tan chhe zawk zawk an ni hran lo ang!
German coach Klopp kha Liverpool manager zinga European game 50 chak tling hmasaber a ni zui ta bawk.
A hmain kum 2004 leh 2010 inkar chhunga game 49 chak tling Rafa Benitez nen khan Europe hnehna chang zing an ni dun a, tunah record malkhalhin, Ningani inkhel kha Liverpool boss ni chunga Klopp-a’n European game 82 a hma-chhawn tlinna chiah niin, Benitez chuan game thumin Europe-ah Anfield club a la hruai tam zawk.
Group E inkhel dangah season liamta quarter-finalists Union St-Gilloise leh Toulouse chu sikhat ve ve thuna inhneh-tawkin, Liverpool chuan round khatna khelh zawhah point hnihin hma an hruaifal ta phawt.
Inkhel dang
English club dang West Ham United pawh an kawtkaiah nuamsain an chak a, Serbia club Backa Topola lamin ‘own goal’ an tihluh nen London club hian 3-1 hnehna nen Europa League Group A bul an tan.
Mualneitu Bayer Leverkusen pawhin minute 16 chhunga goal hnih ngah hmanin Swedish champions Hacken lakah 4-0 hnehna nuamsa an chang a; 2022-23 runners-up AS Roma pawhin Moldova ramah Sheriff Tiraspol chu 2-1-a hnehin, Romelu Lukaku goal hmuh tur a awm.
Season liamta Greek Super League-a pahnihna luahtu Panathinaikos pawhin rin loh takin 2020-21 champion Villarreal lakah 2-0 hnehna an chang!
Stade Rennais midfielder Ludovic Blas chuan tan atanga minute khat a liam hmaa goal hmahruai thun hmanin an mikhual Israel champion Maccabi Haifa lakah nuamsain 3-0 hnehna an sualchhuak ve bawk.
Ajax Amsterdam chuan an khel-mualah sihnih faiin hma hruai hman mah se Olympique de Marseille tan Pierre-Emerick Aubameyang chuan goal hnih a thun a, hun a tawp meuh chuan team pahnih hi 3-3-in an inhnehtawk
Group B game pakhatah Brighton & Hove Albion chuan penalty atangin goal hnih thun mah se an mikhual Greek champions AEK Athens lakah 2-3-in an tlawm zui ta tho.
British team dang Rangers chuan an kawtkaia Senegal forward Abdallah Sima second-half goal khat tihluh hmangin Real Betis lakah 1-0 hnehna an chang hram a; Sporting pawhin Austria ramah si phur hmasa zet mah se Sturm Graz lakah 2-1 hnehna an sualchhuak.
Atalanta tan Charles De Ketelaere leh Ederson-te’n second half-ah goal khat ve ve khungin Serie A club hian sihnih faiin Polish champion Rakow Czesto-chowa an hneh ve bawk.