January ni 27, zirtawp zan khan FA Cup fourth round khelh a ni a, Manchester City chuan Etihad Stadium-a an mikhual Arsenal chu si khat faia hnehin an hnawtchhuak. Inrinni zana inkhelah Manchester United leh Tottenham ten awlsam taka hnehna changin fifth round an lut ve thung.
-- Advertisement --
City chakpuitu Ake
FA Cup fourth round a intum zingah Premier League champion Manchester City leh EPL a hmahruai mektu Arsenal te intum inkhel hi inkhel ngaihven hlawh ber a ni a. An inkhela chak zawk zawk hi champion tura rinkai an ni chhunzawm zel bawk. Etihad Stadium a an mikhual Arsenal lakah defender Nathan Ake chuan City a chakpui.
Premier League ah an chunga awm mek Arsenal lakah Manchester City in chak ngei tumin an player an rem a. FA Cup mah nise City manager Pep Guardiola chuan EPL top scorer Erling Haaland a awltir phal lo. City leh Arsenal te hian an player tha thenkhat awltir bawk mahse chak an tumruh bawka an player thate an awltir tak tak thei chuang lova, bench atangin an tir lut nual tho thung. Arsenal manager Mikel Arteta hi City assistant manager ni a, Pep Guardiola thlachhangdawltu lo ni reng tawh a ni vangin manager pahnihte an inhrechiang viau a, an player te an rem uluk viau bawk.
Inkhel hmuhnawm leh game inbuk tawk ang reng takah hian vannei zawkah mualneitu City an tang a. Minute 64-naa defender Nathan Ake goal thun an chakpui a, FA Cup a champion ngun ber Arsenal an hnawtchhuak. EPL hmahruai mektu Arsenal hi Carbao Cup leh FA Cup atangin an tla tawh a. EPL leh Europa League-ah champion tumin tan an khawh zui ang.
Casemiro a langsar
FA Cup fourth round hi inrinni zan khan khelh chhunzawm a ni a, Manchester United chuan Casemiro goal hnih thun hmangin an mikhual Reading an hneh. Arsenal an hmachhawn tuma khel thei lo Casemiro hian team tan player pawimawh a nihzia goal hmangin a lantir zui zel a, Carabao Cup leh FA Cup-ah United tan goal a thun zawn.
FA Cup a champion ngun ber dawttu Manchester United hi Old Trafford a an mikhual Reading lakawh awlsam takin an chak theih rin lawk a ni a. Chawlhlawk hmaa goal an thun theih loh vangin beise angin thil a thleng lawk lo thung. Chawlhlawk hmain goal thun thei bik lo mahse, United hian second half ah goal thum ngawt an thun ta thung. Minute 54-naah midfielder tangkai Casemiro chuan Antony siamsak atangin hmahruaina goal a thun a. Casemiro vek hian minute 58 na lekah an goal hnihna a thun belh zui leh zat bawk.
Si hnih phur tawh Reading hian goal thun an mamawh em em laiin an forward Andy Caroll chu minute 65-naah hnawhchhuah a ni a, an tan thil duhawm lo zawk a thleng. Caroll hnawhchhuah a nih hnu lawk hian Brazil midfielder Fred chuan minute 66-naah United goal thumna a thun zui leh zat bawk. Tlem zawk an nih bakah si thum ngawt phur tawh mahse Reading in huaisen takin an khingpuite an nawr let a, minute 72-naah Amadou Salif Mbengue chuan goal thunin an si phurh a sut then ve tehmial a, United laka an mualpho lutuk tuk a khuh mawi. Mbenggue goal thun hnu hian goal dang a luh belh thei tawh lova, Manchester United chuan 3-1 a hnehna changin fifth round an lut ta a ni.
Spurs chak nuamsa
United in an mualah goal thum an thun lai hian Tottenham Hotspurs chuan Mimualah goal thum an thun ve thung a, si thum faiin mualneitu Preston North End an hneh.
Tottenham hian chawlhlawk hmain championship team Preston North End lakah goal thun thei bik lo mahse, chawlhlawk hnu lamah goal thum ngawt an thun ta thung. Minute 50-naah Son Heung-min chuan Spurs hmahruaina goal a thun a. Season liam taa EPL top-scorer Son hian minute 69 naah an goal hnihna a thun zui leh bawk. Hun tawp dawn hnaih minute 87-naah an player thar Arnaut Danjuma chuan an goal thumna a thun zui leh a, goal chhuah nei lovin an chak zui ta a ni.