Pathianni zing khan NBA regular season khelh chhunzawm a ni a. Inkhel hmuhnawm takah Los Angeles Lakers chu uiawm takin Boston Celtics lakah an chak lo. Lakers an tlawm lai hian Philadelphia 76ers chuan Denver Nuggets an hneh ve thung.
-- Advertisement --
Season kal meka khel chhe tak, Western Conference-ah 13-na ni mek LA Lakers leh Eastern Conference hmahruaitu Celtics te hi an inhnehtawk viau a, hun pangngaiah chak zawk an awm thei lo hial. Overtime a hnehna chang thei hram Celtics hian bul an tan tha hret zawk a, quarter khatnaah point khatin an chungnung zawk. Quarter hnihnaah Lakers an khel tha ve thung a, point 7 in an chungnung ve thung a, point ruka hmahruai chungin chawlhlawk an hmang.
Chawlhlawk hnu lamah Celtics in bul an tan tha nawn leh a, quarter thumnaah point 6 in an chungnung a, an khingpuite nen an point thawhchhuah zat a intluk ta chiah. Quarter hnuhnung berah chak ngei tumin an inlehthal zak zak. Point 24 ve ve an thawhchhuah tawh hnuin Lakers an chak teuh hle. Lakers player pawimawh LeBron James chuan second 4 chiah a awm tawh laiin chakna point a thawkchhuak teuh hle a, Jayson Tatum laka a foul vangin a point thawhchhuah pawmsak a ni lo thung. He thil thlen danah hian LeBron James a lawm lo viau a, Jayson Tatum lakah a foul awm reng reng a hre lo. James point thawhchhuah hnawlsak a nih vang hian hun pangngai chak zawk an awm thei lo.
Hun pangngaih chak zawk an awm theih loh vangin overtime khelh chhunzawm a ni. Overtime ah hian Celtics in point 20 zet an thawhchhuah laiin, Lakers hian point 16 chauh an thawkchhuak ve thung a, point liin tlawm zawkah an tang.
Boston Celtics lakah uiawm taka an tlawm tum hian LA Lakers player pawimawh LeBron James chuan point 41 a thawkchhuak a, Kareem Abdul-Jabbar record a hnaih deuh deuh zel. James hian NBA ah point 38,271 zet a thawkchhuak tawh a, NBA khelh tawh zawng zawnga point khawl tam ber Kareem Abdul-Jabbar record tluk turin point 116 chiah a mamawh tawh. Season kal mekah LeBron James hian NBA record thar a siam hman ngei tura ngaih a ni.
Pathianni zinga inkhel dangah tunhnaia khel tha tluang tak Philadelphia 76ers chuan vawi sarih an chak zawnna ni turin an khingpui Denver Nuggets chu point 126-119 in an hneh.
Denver Nuggets an hneh tum hian 76ers player pawimawh Joel Embiid chuuan point 47 zet a thawkchhuak a, ball sawhlet vawi 18 zet a dawng tling bawk. An khingpui lakah tlawm mahse Nuggets player pawimawh Kyrie Irving a khel tha tluang zel a, 76ers lakah point 32 thawkchhuak in, khelh ruk chhung zet chu point 30 chin chung lam a thawkchhuak zawn ta zat zat rih. Pathianni zinga inkhel dangah Phoenix Suns in, San Antonio Spurs an hneh a, Chicago Bulls leh LA Clippers ten hnehna an chang bawk.