Sawrkar huaihawtin Mim Kût hmang

Nimin khan Mizoram sawrkar huaihawtin Vanapa Hall-ah Mim Kut hman a ni a, Social Welfare & Tribal Affairs Minister Er. Lalrinawma chu kut thlengtu a ni. Sawrkar ruahmanna hnuaia Mim Kut hman hmasak berah hian Kut thlengtu chuan Mim Kut puala hun buatsaih a ni ta chu lawmawm a tih thu a sawi a. Hnam ziarang humhim pawimawhna sawiin, hmarchhak state-a hnam hrang hrangte hi pawn lam mi tan hriat hran har tak kan ni thei a; kan hranna pholangtu langsar tak chu kan hnam ziarang leh tihphung kan neihte hi a ni, a ti a. Pathianin hnam angin min siam a, hnam chuan tih dan phung (customs & culture) a neihte hi hun kal zelah pawh chhawm nung zel turin mawhphurhna kan nei a ni, a ti bawk.
SW&TA Director Dr. Lalhriatzuali Ralte chuan Mizo zingah Kristianna a luh hnua pi leh pu te’n hnam ziarang leh tih dan phunga an neih tam tak chu thlauhthla mah se, hun kal zelah ngaihtuahna tharin, a tha lo laite paih a, hnam ziarangte hi kan nunah seng let leh in, rinna nen pawh inkawprema kal theih dan ngaihtuaha kal kan ni tiin, Mim Kut pawh chutiang rilru pua buatsaih a nih thu a sawi.
Mim Kut hmannaah hian Mizo Cultural Organization ten Mim Kût lo chhuah dan an entir a, Ngaizuala Pawlten ‘hmanlai khawhar lengkhawm zai’ an entir bawk. MKHC leh CYMA atangin thusawi ngaihthlak a ni a. MCO, Art & Culture Dept., CYMA Choir leh adangte atangin hla chham, zai leh lam te ngaihthlak a thlirho a ni.
Mim Kut pual hian veng engemawzatah thlanmual tihfai hnatlang neih a ni bawk.