Manipur-in India a zawm duh lohna lantir nan bandh
Manipur-in India a zawm duh
lohna lantir nan bandh
Rawlrala che pawl, National Revolutionary Front Manipur (NRFM)-in kum 1949-a Manipur-in India a zawm dodalna lantir nana darkar 24 awh state pum bandh an huaihawt chuan phaizawl district pangaah nunphung a tibuai hle.
Pathianni zanlai atanga Thawhtanni zanlai thleng awh bandh huaihawttute hian Manipur-in India a zawm chu dan lo tiin an dodal a. Phaizawl district-ah chuan mipui chevel an awm lo va, vantlang inkalpawhna lirthei a tlan lo va, zirna in leh sumdawnna hmunte pawh khar a ni.
“Khawlaiah tumah lo dangtu an awm lo chungin mi tlem tê chauhvin pisa an kai,” tiin sorkar hnathawk pakhatin a sawi a. Venhim hna thawktute chu Imphal khawpuia hmun pawimawh zual bikah an duty bawk.
NRFM-in bandh an huaihawtna thupek an chhuahah information & publicity secretary nia inchhal, Sanajaoba Meitei-a chuan an state-in India an zawmna kha Manipur-a inrelbawlna hran awm palzutna leh inremna ziah dan pawh rinhlelhawm a nih thu a tar lang.
An sawi dan chuan inremna kha nawrna avanga ziah a ni a, khatih hun laia mipui aiawha thlan chhuah, Manipur legislative assembly rawnna reng reng a awm lo va. NRFM chuan Manipur State Constitution Act, 1947 an nei a, ram inrelbawlna tur hran pawh kum 1948 khan din niin Manipur hian October 15, 1949-a India a zawm hma khan mahniin dan leh inrelbawlna a nei vek tih an sawi.
NRFM hian October, 1993-a National Convention on the Manipur Merger Issue neihah pawh khan India an zawmna hi dan ang takin a dik reng em tih an lo au chhuahpui tawh tih an sawi bawk.
NRFM hi September 11, 2011-a din kha niin a tirah chuan United Revolutionary Front tia hriat a ni thin a. Kangleipak Communist Party (KCP) hnuaia peng pathumin an din niin ram dang atangin chet an la ber thin.
September 11 pawh khan Imphal West-a Khonghampat khua, national highway 2 (Imphal-Dimapur) dunga kea patrol Central Reserve Police Force (CRPF) an bei nghe nghe a. Police-in chhui zuiin ni ruk hnuah mipa pakhat leh a fate pahnih an man a, an kut atangin AK assault rifle, 9mm pistol leh a mu an mansak tel.
Manipur Police chuan Inrinnia thuchhuah an siamah NRFM pawla mi, Namorjam Boboi Mangang (39), Haorang Khunou Warok Sabal Leikai, Imphal West pawh man a nih thu an tar lang a. Special commando unit leh 10 Assam Rifles tanghoten Imphal West district-a Regional Institute of Medical Science (RIMS), Lamphel, Imphal West gate number 1-ah an man tih an sawi.