Sawrkarin loneitute a ngaihsak

Mizoram sawrkar chuan loneitute tan kawng hrang hranga hma a lak bakah a ngaihsak hle tih R. Lalzirliana, Land Resources, Water & Soil Consevation minister chuan a sawi.
Minister chuan sawrkarna an chan chhungin RKVY Scheme hnuaiah loneituten hlawk zawka thlai an thar chhuah theihna atana an mamawh hrang hrang tuizem, farm pond, terrace, pipe, check dam, contour trench leh tuilian danna te chu cheng nuai 367.45 hmanga an siam sak thu a sawi a. Tuihna humhalh bakah lei chung hang luang ral tur ven kawngah nasa taka hma an lak thu sawiin, rubber, kuhva, coffee leh hmunphiah chingtute tan tanpuina chi hrang hrang an sem chhuak thin tih a sawi.
NABARD RIDF Loan an lak cheng nuai 2211.51 hmangin loneitu chi hrang hrangte tan nasa taka hma an lak thu sawiin, Rengdil leh Kanhmun khuaa chhungkaw 129 te tan rubber chinna tur ram hectare 220 a zau an siam sak thu a sawi a. Rubber huan puitling nei tawhte tan rubber sawngbawlna hmanrua leh rubber smoke house hmun 50-ah an siam sak thu sawiin, rubber rolling machine set 100 leh a hmanrua loneitute hnenah an sem thu a sawi bawk.
Family Oriented SEDP hnuaiah kuthnathawktute chu rubber, kuhva, coffee leh hmunphiah chin tir an nih thu sawiin, Phase-I ah chhungkaw 5680 te hmalakna tur cheng 50000 theuh an sem thu a sawi a. Chhungkaw 5632 te tan Phase-II ah 1st installement sem chhuah leh mek a nih thu sawiin, NABARD WDG hnuaiah cheng nuai 128.41 hmangin Grant-in Watershed Developement Programmee hna thawh a nih thu a sawi a. Thingtlang khaw hrang hrang Aibawk, Bawngthah, Ailawng leh Haulawng ah te vantlang tuikhur tih changtlun a nih thu sawiin, tui hna tih punna turin artificial underground water recharging hnate thawh a nih mek thu leh khaw dangah pawh thawh zel a nih tur thu a sawi bawk.