Lal Zakapa chawimawi

Hmeichhiate zahawmna humhima, chhan tlattu, Mizo lal Zakapa pualin a lalna tlang Khawhri khuaah Inrinni khan chawimawina hun hman a ni a, South Tuipui bialtu MLA, minister Dr R Lalthangliana bakah MLA pahnih – Lalrintluanga Sailo leh Dr L Thangmawia ten an hmanpui.
Minister chuan Mizo lal zingah lal tha tak tak an awm thin a, lal Zakapa tawn ang erawh an tawng vek lo maithei, tiin, lalin a khua leh tuite tana a tih tur dik tak, huaisen taka hmeichhiate zahawmna humhim saktu a ni a, chawmawi a phu hle tih a sawi.
Mizo hnam nunphung leh ziarang vawnnun thar a nih leh theih nan te, thangtharte nunah Mizo hnam hmangaihna a len zel theih nan he hun hi buatsaih a ni tih a sawi a. Ram chuan hmasawn a mamawh rualin, ram leh hnam humhalh a ngai hle, tiin, Zo nun zemawi dik tak lan chhuahtir fo a tul tih a sawi a ni.
‘Zakapa leh Mizo Nationalism, thangtharte tan’ tih thupui chu a puala hun hmanah hian sawi leh zir ho a ni A. Tlaiah Zakapa pualin sial leh vawk hmangin khawtlangin ruai an kil a ni.