Nungcha Humhalh Hapta hmang

October 2-8 chhung hian ram pumah ‘Nungchate Humhalh Hapta’ hman a ni a. Mizoramah October 3 khan hawn a ni.
Environment, Forests & Climate Change minister TJ Lalnuntluanga hoin Thawhlehni khan Champhaiah 69th National Wildlife Week hi hawn a ni a. Kumin Hapta thupui chu “Nungcha Humhalh Kawnga Thawhhona” tih a ni.
EF&CC minister chuan Nungchate Humhalh Hapta chuan Zoram mipui thinlungah hna thawk tharin, ramngaw leh nungcha humhalh kawngah mitinin mawhphurhna kan nei theuh a ni tih min hriattirtu ni se a duh tih a sawi a. “Khawvel changkang chho zelah leilung hausakna, thing leh mau kan ti chereu nasa a, ram kan tihchhiat leh hemi avanga boruak, sik leh sa danglam nasa lutuk veng leh siamtha turin theihtawpa tan kan lak a tul a. Ramngaw kan humhalh that chuan kan nunna hnar pawimawh tak tuihna pawh kan humhalh tel a, Mizoramah tui mamawhna a pun zel laiin tuihna in tlem lam a pan zel hi a pawi hle,” a ti.
Hetiang hi kan dinhmun a nih avangin kan state-in hmasawnna kawng kan zawh mekah environment humhalh nen kan kalkawp tir a tul tih sawiin, hei hi EF&CC department thiltum a ni tih a sawi.
Dampa Tiger Reserve field director & DCF (WL) PC Laltanpuia chuan nungcha humhalh kawnga kan dinhmun a sawi a. Association for Environmental Preservation president K Lalmuansanga’n khawtlanga nungcha humhalh chungchang a sawi a ni.
Honorary wildlife warden, MJA Champhai District vice president Lalhlupuia chuan I&PR department leh MJA Champhai-in September 18-25 chhunga Sikkim Nature Learning Centre Tour an neiha an thil zirte report a pe a ni.