Eiruk ching leh nungchang thlahdah vote lo ngam ang – Central YMA

Central YMA chuan MLA candidate zingah eiruk ching leh nungchang thlahdah an awm a nih chuan vote lo ngam turin mipui a chah.
2023 MLA inthlanpui neih tur denchhenin Central YMA chuan, India ram puma entawntlak inthlan felfai leh muanawm tak kan neih leh ngei theihnan inthlan thuchah a siam a. Ngaipawimawha zawm turin Mizoram mipui leh political party tinte a ngen.
Ram rorelna chu mipui siam, a chhiat a thatah mawhphurtu kan ni tih hria a, khua leh tui diktakte chuan vote thlak theuh turin a ngen a. Mizo hnahthlak zingah chibing/ kohhran bil inthliar hrang zawnga chetna chu tha a ti loa; chutiang zawnga hma la lo tur leh chibing/ sakhaw bing puala candidate siam lo turin political party leh mipui a ngen.
Candidate-te chu ram hruaitu tur an nih avangin zu ruih hmang, eiruk ching leh nungchang thlahdah an awm palh a nih pawhin vote loh ngam turin mipui a ngen a. Hmanraw thianghlim lo chelek reng reng an duh loa, mitinin chhia leh tha hriatna thiang leh zalen tak hmanga vote an thlak theih nan sum leh therhlo dang hmanga vote lei leh hralh ti lo tur leh, mipui, pawl hrang hrang leh kohhrante pawhin party leh candidate-te sum leh thildang dil lo turin a ngen.
Political party-te leh party official candidate ten khawtlang huapa ruai siam chu tha a ti lo, tih sawiin, tumahin hetiang zawnga khawtlang huap ruai siam lo turin a ngen a. Party-ten sawrkarin a phal dan ang bak leh khawtlang tana ninawm leh hnawksak thei tur ang chi aurinna ti lo turin a ngen.
Naupang kum tling lo leh thil kalphung hre pha lo, inthlan boruaka hnuklut lo tur leh hmanruaa hmang lo turin a ngen a. Party manifesto-ah a taka tihhlawhtlin theih ngei tur chauh tarlang tur te; social media hrang hrangah thu belhchian dawn lo leh finfiahna awm lo ang chi, party hamthatna atana thehdarh lo turin a ngen a ni.
‘Inthlan muanawm, boruak tha tak hnuaia neih theih nan a thlangtu mipui leh mawhphurtu zawng zawng theihtawp chhuaha tan la turin kan ngen a ni,’ Central YMA hian a ti.