Kum 104-ah skydiving tiin record siam inbeisei

Chicago a cheng, pitar, kum 104 mi chu thlawhtheihna atanga zuang chhuakin, skydiving a la ti thei a, khawvela skydiving ti zinga upa ber record a nih a beisei a, Guinness World Records-ah a thlen mek a ni. Hetiang record ding lai chu May 2022-a Sweden a cheng Linnea Ingegard Larsson, kum 103, siam a ni.
Kan pi hi a hming chu Dorothy Hoffner a ni a, Illinois hmarlamah skydiving hi tiin, a walker kalsanin, thlawhtheihnaah a chuang a, thlawhtheihna atang hian midang pakhatin skydiving tihpuiin, a zuan chhuah pui ta a ni.
Dorothy chuan, “Kum te chu number mai mai lawm,” tiin leia a tum leh hnuah hlim takin a sawi a ni. Hoffner hian a thatlai hunah skydiving a tingai bik lo va, a tih hmasak chu a kum 100 tlin kumah niin, a kum 100 tlin champha lawm nan a skydive a ni.
Hoffner chuan a skydive hmasak ber tum chuan a zuang chhuak ngam lo va, an pawhchhuah luih a ngai niin a sawi a, mahse, tun Pathianni kaltaa record siam tuma a skydive-naah hi chuan phur takin, hlauh nei miah lovin a ti thei tawh a, US Parachute Association certified instructor-in a zuan chhuah pui a, feet 13,500 a sang atangin thlawhtheihna atangin an zuang chhuak a ni.