Thubuai ngaihtuah lai jail tangte dinhmun thlir

District Legal Services Authority Chhamphai buatsaihin an chairman, District & Sessions judge Champhai Liansangzuala kaihhruaiin Undertrial Review Committee chu Nilaini khan an thukhawm.
Champhai Judicial District hnuaia administrative district pahnih, Champhai leh Khawzawl atangin district thu neitute, police leh jail hotute, judicial officer te an tel a ni.
Chairman chuan Supreme Court leh National Legal Services Authority-in a phut anga neih a ni tih a sawi a. Thutkhawmah hian thubuai ngaihtuah lai jail tang (undertrial prisoner) te dinhmun thlirhoin, dan anga an chanvote chak lehzuala an hmuh theih dan tur sawi a ni. Dan bawhchhiatna chungchang leh a venna kawnga hmalakna thlirin, thawhhona tura hmachhawpte sawi a ni.
Jail tang zingah rualbanlohna (disability) avanga harsatna neiten an khawsak awlsamna atan an hmanraw mamawh ang an hmuh theihna’n ngaihtuah dan tur te sawi a ni.
Law enforcement leh medical lam thawktute indaihlohna avanga harsatna tawh thin leh a sutkian theih dana rawtna siam tul te an sawi bawk.