Lucknow-ah kel vulh dan zir

FOCUS hnuaiah Mizoram district 6 atanga thlan mi 23 chuan Lucknow-a kel vulh zirna hmunpui an tlawh.
Serchhip, Champhai, Kolasib, Mamit leh Saitual district atangin kel vulhtu mi 4 theuh leh Khawzawl district atangin mi 3 bakah anmahni hruaitu mi 2 nen, an vaiin mi 25 hian training neih pahin Uttar Pradesh Lucknow khawpui daifem Rasoolpur-a kel vulh zirtirna hmunpui, The Goat Trust Cente, International Institute of Goat Management hi kuthnathawkte chawikanna scheme chi khat – Fostering Climate Resillient Upland Farming System (FOCUS) bultumin an tlawh a, Ningani khan an thleng.
Heng mite hi Boar Semen Station manager pahnih Dr Vanlalhriatpuia Kolasib leh Dr H Beirohly Serchhip ami ten hruaiin, vawiin – October 6 hian Lucknow atanga km.90 vela hlaa kel vulhna hmun leh a chaw siamna hmun an tlawh anga, October 7 hian training hi an zo ang.
Kel vulh zirna The Goat Trust mithiamten an hriat tur tul an lo hrilh a. Kel enkawl dan tha leh awlsam, hnim damdawi hman tangkai dan, hlawk leh tha zawka kel vulh dan an inhrilh bakah a chaw leina atana vawk leh bawng vulh aia senso tlem zawk a nih dante hrilhhriat an ni.