Ni hnih chhungin Mizorama Meth’ man tam tum 2 thleng

Ruihhlo chi khat, Methamphetamine chu Mizoramah man a ni fo tawh a, vawikhata man tam ber tum chu tunhnaiah a ni zawnin a thleng.
October 3 khan Lengpui Airport-ah Methamphetamine fim chi (Crystal Meth) kg. 10.4 man a ni a. Aizawl atanga Delhi-a kal tum Lalremthangi (38) suitcase atanga man a ni. Suitcase hi INDIGO security x-ray khawla scan a nih laiin rinhlelh a ni a, Mizoram Police ANTF (Anti-Narcotics Task Force) Unit chuan ruihhlo hi belchiangin, man nghal a ni. Suitcase neitu pawh hi hren nghal niin, ND&PS Act leh Foreigners Act hnuaiah Special Narcotics Police Station-ah case ziahluh a ni.
Mizoram Police sawi danin, meth’ an man neitu hi Myanmar khua leh tui a ni a, Delhi-ah Spa-a thawk a ni. Tunhnaiah Myanmar tlawhin, ruihhlo tam tham tak nen Delhi a pan leh laia man a ni ta a ni. Meth an man hi tum khata Mizorama man tam ber tum nia ngaih a ni a. Kumin August khan Mizoram Police ANTF hian kg.3 vel an lo man tawh bawk.
October 4 zan dar 7.00 vel khan Aizawl District Special Branch (DSB) Team chuan Zemabawk East-ah lirthei pakhat MZ01- 7001 (Tata Intra) an endiknaah Crystal Methamphetamine kg 11.6 a rit chu a kawltu Ropianga (37) Khawmawi Myanmar nia inchhal kut atangin an man. Bawngkawn Police Station-ah ND&PS Act leh Foreigners Act hnuaiah thubuai ziahluh a ni.
October 3-a meth man aia a tam avangin, ni khat chhungin Mizorama meth man tam ber tum hnihna a thleng.