RTI Hapta hmang tan

Right to Information (RTI) Week 2023 chu Ningani atang khan Mizoramah hman tan a ni a, Aizawlah chuan larsap Dr Hari Babu Kambhampati hoa hman a ni.
Larsap chuan RTI Act 2005 chuan sawrkar langtlang a awm theih nan a pui nasa hle tih a sawi a. Mipui chu ‘RTI Online’ hmang tangkai deuh deuh tura chahin, RTI hmang tangkai duh, hmanrua nei tha tawk lo tan Common Service Centres leh Rural Information Kiosks chhawpchhuah a ni tih a sawi bawk.
“Tun ang, digital khawvelah chuan sawrkar kalphunga kan hriat duh kan hriat zung zung hi a pawimawh a; chu chu khua leh tuite chanvo leh dikna a ni mai loa, roreltute rorel dan leh sawrkar an kalpui dan kan hriat a, kan vil zel hi kan zavai mawhphurhna ni tel a, chumi atan chuan RTI hi kan hmanraw tangkai a ni,” a ti. Chutihrualin, danin a phut leh beisei ang baka hmansual theihna laka inven a tul tih a sawi bawk.
Mizoram Information Commission-a chief information commissioner John Neihlaia chuan sawrkar langtlang leh rintlak siam turin mipuiin RTI hmang tangkai se, chu chuan hlemhletna pawh a tih tlem ngei a ring tih a sawi a. RTI activist pahnih – Central YMA president hlui Vanlalruata leh journalist F Lalliansanga ten RTI Act an hmanna kawngah an tawnhriat an sawi bawk.
RTI Week hawnnaah hian central leh state sawrkara SPIO leh Asst. SPIO bakah police leh armed force aiawhte an tel a. October 12 thleng hman a ni ang.
Kum 2006-a ding tan Mizoram Information Commission hian, RTI hmangtuten an zawh duh department atanga an duh ang tawk chhanna an hmuh loh avanga Commission an punna (second appeal) 134 leh complaint 157 an dawng tawh a; State Assembly-a pharh Annual Reports tum 17 a tichhuak tawh a ni.