Kawng siamthat loh chuan Bungraw phur lirthei din tum

Mizoram hmun hrang hranga kawngpui a chhiat nasat avang leh lirthei tan tlan a harsat avangin mihring phur leh mipui mamawh phur lirthei neitute leh khalhtu pawl hrang hrang inzawmkhawm Joint Action Committee chuan October 8 thlenga kawng chhe zual lai siamthat a nih loh chuan lirthei tlan loh an tum tih an sawi.JAC hruaitute chuan Vairengte leh Sairang inkar, Kawlkulh leh Hliappui inkar, Kawlkulh leh Champhai inkar chu a chhe hle tih sawiin, kawng tha lai awm mah se, a chhe zual lai chu tlan ngam loh khawpa a chhiat thu an sawi. Kawngchhe zual lai hi sawrkarin chak zawka a siam theih nan October 9 zing dar 7.00 atangin maxi cab atanga truck lian thlengin Vairengte leh Sairang inkar kawng siamthat a nih hma chu tlan tawh loh an tum tih an sawi a. State dang truck ho pawh tlan lo tura ngen an tum tih an sawi.
Sawrkarin a siamthat leh thuai an beisei avangin hreawm tak chungin an tlan lui thin a, thenkhat an chetsual phah hial tih an sawi. Kawng siamthat ngen tumin chief minister hmuh an tum a, an hmuh theih loh avanga lehkhaa an thlen hnu thlengin hmalakna hmuh tur a awm loa, tiamchin awm loa lirthei din tir mai an tum ta tih an sawi a. Sawrkar dodal leh mipui harsatna thlen zawnga hma lak an hreh hle chungin, kan zavai tana tha tura ke pen an ni tih hria a, an hmalakna thlawp turin an ngen tih an sawi.
Joint Action Committee-ah hian Mizoram Truck Owner’ Association, Mizoram Truck Drivers’ Assioation, Mizoram Tipper Owners’ & Drivers Association, Kolasib District Drivers Welfare Joint Action Committee leh Mizoram Oil Tanker Driver Association an tel a ni.