Presbytery Inkhawmpui-ah inkhawm tihtlem chungchang ngaihtuah

October ni 5-8 chhung khan hmun
hrang hrangah Presbyterian Kohhran inkhawmpui sang ber dawttu Presbytery Inkhawmpui an nei a, inkhawm tihtlem chungchang an ngaihtuah.
Synod Executive Committee-in kohhran inkhawm tihtlem chungchang hi Presbytery te’n ngaihtuah se a ti a, kuminah Presbytery hrang hrangin an ngaihtuah ta a ni.
Hriat theih chinah Aizawl East I Presbytery, Aizawl Hmarchak Presbytery leh Aizawl Hmarthlang Presbytery-ahte palaiteah inkhawm tihtlem duh lam an tam zawk a, Aizawl Chhim Presbytery-ah chuan inkhawm tihtlem duh leh duh lo hi an inzat.
Aizawl Chhimthlang Presbytery-ah chuan sawihona hi a tawk e tiin thu an dah a, Aizawl East Presbytery, Aizawl Central Presbytery leh Aizawl Bethel Presbytery te’n inkhawm tihtlem hi tul rih lovah an ngai.
Inkhawm tihtlem chungchang hi Presbytery lam atanga a luh avangin Synod Inkhawmpuiah ngaihtuah a lo ni tawh a, an sawiho hnuah Synod Executive Committee kutah dah a ni. Synod Executive Committee chuan Presbytery tinah sawiho ni se tiin an rel a, chumi bawhzui chuan kuminah Presbytery hrang hrangin an sawiho ta a ni.
Presbytery tan ni, Ningani-ah Upa exam neih a ni a, Chawlhni chawhmaah upa exam paltlangte hi nemngheh an ni.
Zirtawpni leh Inrinni-ahte ro an rel a, Chawlhni chawhnu inkhawmah Lalpa Zanriah an theh a, chatuan ram pan ta kohhran upate sunna hun hman a ni bawk. Chawlhni zanah Moderator kalchhuakte’n sermon an sawi.
Khawthlangtuipui Presbytery, Tlabung Zodin Presbyterian biak ina neih tur chu Tlabung kawng a chhiat em avangin December-a neih turin an sawn a, hmun dangah chuan Presbytery Inkhawmpui hi a hunah an nei thei vek nia hriat a ni.