Afghanistan lirnghing vangin nunna chan tam
Western Afghanistan chu lirnghing na takin a sawi avangin mi za tam takin nunna an chana ngaih a ni a, he lirnghinnna hmun hi Iranian border bul mai a ni.
Nunna chan zah chiah hi hriat theih a la ni lo va, lirnghing hi 6.3 magnitude laia na niin city of Herat bula thingtlang khua 12 vel chu a sawp na hle tia sawi a ni.
Lirnghing thlen hnuah aftershock na zet zet thleng bawkin building tam tak chimin a awm a. Rescue workers te chuan chhun leh zan pawh sawi lovin chhanchhuah hna an thawk mek bawk a. Mi sang chuangin hliam an tuar bawk a ni.
Afghansitan chu medical facility thatlohna a nih avangin damdawi in te chuan an enkawl sen loh hliam tuar an nei a. UN leh pawl hrang hrang te chu emergency supply pe turin an hmanhlel nghal bawk.
“Office-a kan awm lai niin thawklehkhatah building nghing nasain banga thil tar te chu a tla chum chum a. Bang leh building thenkhat a chim zui a ni. Ka chhungte ka la be pawp thei lo va, an chungah eng nge thleng pawh ka ngaihtuah ngam lo,” tiin Herat a cheng Bashir Ahmad chuan a sawi.
Herat Central Hospital-ah chuan hliam tuar enkawl ngai an lut tup tup a, damdawi in pawnah intravenous drip te pawh khai mai hial niin emergency a enkawl sen loh an nei a ni.
Herat-a Injil district chu lirnghing hian nuai nasa zualin in chim ten kawngpui an danchah tlat avangin chhanchhuah hna pawh thawh chak theih a ni dawn lo tia sawi a ni bawk a.
“A rapthlak takzet a, khatiang thil kha ka la tawng ngai lo,” tiin zirlai Idrees Arsala chuan a sawi a. Lirnghing thlen hnua an classroom chhuahsan hnuhnung ber a nih thu a sawi bawk.
Herat hi Iranian border atanga km 120-a hlaa awm niin Afghanistan cultural tia sawi a ni a. Mihring 1.9 million vel an cheng anga ngaih a ni.
Afghanistan hi lirnghingin a nuai fo va, a bik takin Hindu Kush mountain range chu Eurasian leh Indian tectonic plate te insikna laia awm a nih avangin lirnghing a thleng zing hle a ni.
Nikum June thla khan Paktika a 5.9 magnitude a lirnghing avangin mi 1,000 chuangin nunna chan phah tawhin mi sang chuangin chenna in leh lo an hloh phah tawh bawk.