Lirtheia eizawngte kan ngaipawimawh dawn – Lalnunmawia

Congress-in sawrkarna a chang a nih chuan lirthei hmanga eizawngte an ngaipawimawh dawn tih an party vice president Lalnunmawia Chuaungo chuan a sawi.
MPCC vice president chuan Mizoram Maxicab Association, Aizawl City Bus Owner’s Association leh Aizawl Two-wheeler Taxi Association hruaitute nen an inkawm tawh a, inremna thuthlung an siampui tawh tih a sawi a. Congress a sawrkar chuan lirthei hmanga eizawng thinte harsatna tawh hrang hrang chinfel ngei an tum tih sawiin, tang puihna chhawpchhuah sak an tum tih a sawi.
Mizoram Maxicab Association tan one time replacement bakah All Mizoram permit tihtawp tawh chu ennawn that leh tur a nih thu sawiin, a duhte tan chauh All Mizoram Permit pek a nih tur thu MPCChruaitu hian a sawi a. Lirthei thlan bik nei loin MVI-in public service atana a rin ngam company dang siam lirthei hrang hrang chu maxi cab atan hman a nih tur thu sawiin, terminal stand tha tak an ngaihtuah tur thu a sawi.
Aizawl City Bus permit chu vawikhat aia tam replacement tih theih tura ruahmanna an siam thu leh Aizawl City Bus-ten wheel base 3400mm – 3600mm chungchanga an harsatna sutkian a ni dawn tih a sawi a. Sawrkar dan dinglai angin City Bus atan thutna 25 awm company hrang hrang siam a hman theih tur thu a sawi a ni.
MNF sawrkarin two-wheeler taxi permit chu intam chhuah vek khawpa a pek thu sawiin Lalnunmawia Chuaungo hian a sawi a. Karkhatah vawi hnih an din thin chu Congress-in sawrkarna a chan chuan karkhatah vawi ruk tal tlantir an tum tih a sawi. “Sawrkar leh mimal two-wheeler te chauh intlanchhawk a nih theih nan ruahmanna kan siam dawn,” a ti.
Two-wheeler taxi tan khawpui chhungah an dinna tur mumal zawk a buatsaih sak an ni dawn, tiin, lirthei neitute tan a awlsam zawk nan oil depot remchangah pollution test-na dah an tum tih a sawi. Lirthei neitute tan awlsam leh rang zawka insurance service a awm theih nan insurance company-ten regional office an neih ngei theih nan leh lirthei hlui lei leh hralh chungchangah hming thlak buaithlak thin leh fee sang lutuk chu an siamthat tur thu a sawi bawk.