MJA Serchhip District chuan mipui leh sawrkar tana a thawh that em avanga ‘Namaste Award 2026’ dawngtu Serchhip district bawrhsap Paul L Khuma (MCS) chu Thawhtanni chawimawina hlanin a pualin zanriah an buatsaihsak.
MJA Serchhip District president Kapliana Pachuau chuan, khawvel piantirh ata la awm ngai lo, India hmarchhak puma sawrkar hna thawk tha ber ‘Namaste Award’ a dawng chu an lawmpui tih a sawi a. Serchhip district mipui chauh ni loin, Zoram mipui zawng zawngin an lawmpui ve ngei a ring tih a sawi a ni.
“Sawrkar hna hi run dalah, hlawh hmuhnan lek a thawh theih a, chutihrual chuan ram leh hnam hmangaihna thinlung tak tak atanga thawktu chuan sawrkar kalphung leh tihdan phung pangngai piahlamah thil thar a ngaihtuah chhuak a, chu chuan nasa takin hmasawnna a thlen thei thin. Chutiang mi DC kan nei hi kan chhuang a ni,” a ti.
An DC hnathawh hriatpuia Namaste Award hlantu Amazing Namaste Foundation panel member-te chungah pawh lawmthu an sawi tih sawiin, Serchhip MJA hmingin memento, Thangchhuah diar leh Tawlhloh Puan a hlan nghal.
Serchhip bawrhsap Paul L Khuma chuan, a chawimawina dawn chu phu lo a intih thu a sawi a. Sawrkar hna a thawhpuite leh NGO hrang hrang bakah VC leh MJA ten an thawhpui that vang a ni thui hle tih a sawi.
‘Namaste Award 2026’ hi category 5-a then niin, Paul L Khuma hian ‘Public Service & Governance’ category-ah chawimawina hi a dawng a. India hmarchhak ram hmasawnna leh sustainable development a awm theihna atana thawh hlawk tak, kalphung thar leh dangdai (innovative) hmanga entawn tlaka thawkte chawimawina niin, hmarchhak state atanga dawng hmasa ber a ni.
He chawimawina dawng tur hian India hmarchhak state 8 atangin nomination call a ni a. State tinin nominee tur thlangin independent panel hnenah thehluh a ni a, nomination tam tak zingah mi 6 thlifim lehin, ngun taka endik hnuah Paul L Khuma hi thlan a ni.
Get real time updates directly on you device, subscribe now.
Prev Post
Next Post